A mocidade socialista galega mobilizarase o 1 de maio en Santiago

A organización fai un chamamento á mocidade traballadora galega a saír ás rúas para denunciar o que cualifican como un incremento das agresións imperialistas a nivel global, así como o rearmamento da Unión Europea e o aumento do militarismo nos estados europeos. Segundo explican, esta convocatoria enmárcase nunha campaña política iniciada durante o mes de marzo, na que desenvolveron 16 actos en barrios e campus universitarios de toda Galicia.

A CMS, integrada no Movemento Socialista, promove por primeira vez unha mobilización de carácter especificamente xuvenil nesta data sinalada. Ademais, sinalan a necesidade de combater a percepción crecente dunha mocidade cada vez máis próxima aos discursos da extrema dereita e do fascismo. Neste sentido, defenden a existencia dunha xuventude organizada e disposta a articular unha resposta política en clave socialista.

A mobilización terá lugar o 1 de maio ás 19:30 horas, con saída desde a Praza Roxa de Santiago de Compostela, nunha convocatoria que aspira a reunir mocidade de toda Galicia baixo unha mesma reivindicación política e social.