A ‘Caldeira’ solidaria pola DANA
O Monbus Obradoiro vai realizar unha campaña de recadación de fondos a favor da Cruz Vermella para que as doazóns cheguen aos afectados pola DANA tanto na Comunidade Valenciana como noutros puntos afectados da xeografía española.
Líder Redacción
7 de noviembre de 2024 a las 16:03
O obxectivo final é que a afección do Monbus Obradoiro e todas as persoas que o desexen poidan aportar o seu gran de area para axudar aos afectados pola DANA. Para iso, o Monbus Obradoiro, xunto con empresas, asociacións e persoas individuais, realizará un sorteo de diferentes produtos: merchandising do equipo asinado polo plantel, dúas tarxetas regalo de Carrefour de 100 euros cada unha, unha acuarela de Lucía Medina (@lutxi.arte) relacionada co club e algunha sorpresa máis.
Para poder participar no sorteo dalgún destes agasallos, débese facer unha doazón superior a 4 euros á Cruz Vermella para axudar aos afectados pola DANA. Para iso, está habilitado o Bizum 33512 ou tamén se pode enviar un SMS coa palabra AXUDA ao 38092 e doar 6 euros (o importe íntegro de 6 € da mensaxe destinarase á Cruz Vermella Española) (Movistar, Vodafone, Orange, Yoigo, Euskaltel). Att Cliente 900 104 971. donativos@cruzroja.es Pol. Prot. Datos www.cruzroja.es). Tamén se pode realizar a doazón a través do seguinte enlace da Cruz Vermella.
Posteriormente, deberedes enviarnos un correo electrónico á dirección acaldeirasolidaria@obradoirocab.com achegando unha copia do xustificante ou resgardo da doazón, xa sexa mediante o Bizum, SMS ou na propia web.
A campaña, en colaboración co patrocinador do partido fronte ao Tizona Burgos, As Cancelas, realizarase desde o xoves 7 de novembro ás 14:00 horas ata o domingo 10 de novembro ás 23:59 horas. Durante este período, todas as persoas que fixeran unha doazón á Cruz Vermella por un importe igual ou superior a 4 euros poderán enviar o seu xustificante ao correo electrónico facilitado para participar nos sorteos.
Os gañadores serán anunciados o martes 12 de novembro e comunicaráselles mediante notificación ao mesmo correo electrónico desde o que enviaron o xustificante da doazón.
Agradecemos á Cruz Vermella, As Cancelas, Lucía Medina e a todos aqueles afeccionados e patrocinadores que apoian esta campaña de doazón polos afectados pola DANA.