«A actual programación do Apóstolo resta afluencia ao Día do Traxe»
A Asociación do Traxe Galego celebra o seu 30 aniversario cun formato renovado para visibilizar a tradición e implicar máis á cidadanía
Líder Redacción
19 de julio de 2025 a las 22:04
O Día do Traxe Galego, un dos actos centrais e máis simbólicos das festas do Apóstolo, vivirá este 2025 unha edición especial co gallo do 30 aniversario da Asociación do Traxe Galego. A principal novidade será a saída simultánea desde as sete antigas portas da cidade de Santiago, coa intención de involucrar a máis veciñanza e visitantes nun desfile coral, musical e con cor.
“Este ano queriamos facer algo distinto, e por iso decidimos saír dende as sete portas antigas de Compostela, para que a xente se reparta e participe sen necesidade de anotarse. Se tes un traxe, vístete e vai á porta que queiras”, explicou Consuelo Vázquez, presidenta da Asociación. A cita será o domingo, cunha saída conxunta arredor das 12:15 h, que culminará na Praza do Obradoiro e continuará cunha ofrenda e a recepción institucional, esta vez nos Taldorreis Católicos debido ás obras no Pazo de Raxoi.
A partir das 16:00 h terá lugar o tradicional concurso de traxes na Hospedería de San Martín Pinario e, desde alí, sairá un pasacalles ata a Praza da Quintana onde se entregarán os premios. A entidade, que traballa con reproducións baseadas en traxes históricos cedidos por particulares, fai un chamamento para visibilizar o traxe galego non só en datas sinaladas. “Gustaríanos que o traxe se vise máis a cotío, como acontece noutras comunidades”, reivindicou Aurelio Gianzo, vicepresidente da asociación.
“Hai menos afluencia porque non hai artistas de renome, pero é unha aposta polo local”
A presidenta e o vicepresidente da Asociación do Traxe Galego tamén valoraron a programación xeral das festas do Apóstolo 2025, destacando que a aposta polas propostas culturais locais ten un valor importante, aínda que recoñecen que reduce o poder de convocatoria. “Hai menos afluencia porque un artista de renome trae moita máis xente de fóra”, sinalaron. Aínda así, amosáronse satisfeitos de que o traxe galego continúe a ser protagonista dentro dunha programación que quere “sacar cara polo noso”.
