Santiago escolle a proposta que definirá a paisaxe nocturna da contorna da Catedral nas vindeiras décadas

Con esta decisión péchase un proceso estruturado en dúas fases, no que se avaliaron un total de 21 propostas nacionais e internacionais, co obxectivo de redefinir a paisaxe nocturna dun dos conxuntos patrimoniais máis singulares de Europa.

As persoas integrantes do xurado foron recibidas este martes pola Corporación municipal no Pazo de Raxoi. En declaracións aos medios, a alcaldesa, Goretti Sanmartín, agradeceulles “o seu traballo, dedicación, exquisitez e delicadeza no tratamento das 21 propostas que chegaron e das tres seleccionadas como finalistas” e amosou a súa satisfacción por que “na sesión de hoxe acabarán decidindo a proposta que vai ser un proxecto piloto feito na prazas das Praterías para despois  ter un modelo que homoxeneamente acabe completando o conxunto desa necesaria paisaxe nocturna do corazón de Santiago de Compostela”.

Na mesma liña, o arquitecto municipal Javier García Castelo destacou a alta calidade e o respecto ao patrimonio das propostas aspirantes e confiou nun acordo unánime para elixir a gañadora. En nome do xurado, Teresa Táboas, puxo o foco na transcendencia internacional deste certame no eido do urbanismo nocturno e asegurou que “será o punto de comezo de futuras intervencións noutros conxuntos arredor do mundo nos que Santiago vai estar aí como un faro iluminando”.

Alta calidade técnica e conceptual

Na fase final, o xurado analizou os anteproxectos presentados baixo os lemas “Hermes”, “Shh… See the silence” e “Ad maiora semper”, atendendo á súa estratexia lumínica, integración estética e patrimonial, viabilidade técnica e económica, eficiencia enerxética, control da contaminación lumínica e capacidade para construír unha iluminación emocional e acougada, que xere benestar e reforce a identidade da cidade histórica. Neste sentido, o xurado destacou a alta calidade técnica e elaboración conceptual das tres propostas finalistas e o seu aliñamento cos criterios do concurso.

A Catedral de Santiago e as prazas que a rodean —Obradoiro, Praterías, Quintana e Inmaculada— forman parte dun espazo urbano de valor universal excepcional, vinculado historicamente á luz a través da simboloxía da Vía Láctea. A proposta gañadora permitirá avanzar cara a unha nova paisaxe nocturna para a cidade histórica, coa Praza de Praterías como proxecto piloto, concibido como banco de probas para unha futura implantación progresiva no conxunto do ámbito catedralicio.

Un xurado internacional de prestixio

A avaliación das propostas correu a cargo dun xurado integrado por profesionais de prestixio internacional como o arquitecto británico David Chipperfield, premio Pritzker e Stirling; a arquitecta Teresa Táboas, vicepresidenta de Europa Occidental na Unión Internacional de Arquitectura (UIA); o experto en iluminación urbana Roger Narboni, fundador do estudo Concepto en París; a editora da revista Lightecture e embaixadora en España de Women in Lighting, Esther Torelló; e o catedrático Manuel Castiñeiras, presidente do Comité Internacional de Expertos do Camiño de Santiago, xunto con representantes das administracións convocantes.

No marco do PSTD

O Concurso Internacional de Iluminación enmárcase no Plan de Sostibilidade Turística de Santiago (PSTD), promovido polo Goberno de España, a Xunta de Galicia e o Concello de Santiago de Compostela, cun investimento total de 3 millóns de euros para proxectos de transformación sostible.

Esta iniciativa constitúe unha das actuacións centrais do Plan e supón unha aposta pola innovación lumínica aplicada ao patrimonio, aliñada co desenvolvemento dun destino turístico sostible que mellore a experiencia dos visitantes e a calidade de vida da veciñanza. A asistencia técnica corre a cargo da empresa compostelá TRIVIUM, responsable da coordinación organizativa do concurso.