Ames inviste máis de 730.000 € no novo servizo de desbroce, limpeza e mantemento do rural

O concelleiro de Obras e Servizos Básicos, Gustavo Nieto, explica que “este servizo foi licitado por primeira vez no ano 2021 co obxectivo de poñer en marcha unha brigada específica de limpeza e mantemento no rural. O anterior contrato tivo que resolverse debido á quebra da anterior concesionaria de dito servizo. Agora, vólvese apostar por este servizo cun novo contrato que foi adxudicado á empresa Coregal Parques e Xardíns SL

Ames, 10 de abril de 2026.- O Concello de Ames vén de aprobar en Xunta de Goberno Local este xoves, 9 de abril, a adxudicación do novo contrato dos servizos de desbroce, limpeza e mantemento dos núcleos rurais do municipio. O orzamento de adxudicación do novo contrato ascende a 733.920 euros (IVE incluído), que estará dividido nos exercicios 2026, 2027 e 2028. O contrato terá unha duración inicial de dous anos, con posibles prórrogas. A través deste servizo vanse realizar os traballos de limpeza, mantemento e conservación dos accesos e interiores dos núcleos rurais. Tamén se realizarán tarefas de mantemento dos contornos de lavadoiros, igrexas, locais sociais, muíños, beirarrúas e canalizacións de pluviais de titularidade municipal. Actuarase nas 11 parroquias do concello de Ames e nun total de 107 núcleos rurais.

A Xunta de Goberno Local vén de aprobar a adxudicación do novo contrato dos servizos de desbroce, limpeza e mantemento dos núcleos rurais amesáns. Dito contrato foi adxudicado á empresa Coregal Parques e Xardíns SL. Deste xeito, o Concello volverá a contar cun servizo específico para realizar traballos de mantemento e conservación dos accesos e interiores dos núcleos rurais, incluíndo tamén as zonas próximas aos lavadoiros, igrexas, locais sociais, muíños, beirarrúas, canalizacións de pluviais, etc., que sexan de titularidade municipal.

O Concello de Ames ten o deber de executar as correspondentes operacións de conservación e mantemento dos viarios de acceso e interiores dos núcleos rurais co obxectivo de preservar o estado de ditas vías. Deste xeito, a través de dito servizo vanse executar traballos de desbroce nas marxes dos camiños de acceso aos núcleos de poboación, así como nos seus interiores.

O alcalde, Blas García, destaca “a importancia de volver a contar con este servizo que foi posto en marcha no ano 2021 cunha moi boa acollida entre a veciñanza amesá. É unha clara aposta polo rural amesán, e en concreto, unha aposta seria e firme pola conservación dos nosos núcleos rurais. Coa adxudicación deste novo contrato o Concello de Ames volve apostar pola economía social e os centros especiais de emprego”.

O concelleiro de Obras e Servizos Básicos, Gustavo Nieto, explica que “este servizo foi licitado por primeira vez no ano 2021 co obxectivo de poñer en marcha unha brigada específica de limpeza e mantemento no rural. O anterior contrato tivo que resolverse debido á quebra da anterior concesionaria de dito servizo. Agora, vólvese apostar por este servizo cun novo contrato que foi adxudicado á empresa Coregal Parques e Xardíns SL”.

Investimento municipal

O orzamento de adxudicación ascende a 733.920 euros (IVE incluído), que está dividido nos exercicios 2026, 2027 e 2028. Durante o exercicio 2026 (de maio a novembro) está previsto un gasto de 183.480 euros. Para 2027 (de decembro de 2026 a novembro de 2027) o gasto do contrato ascende a 366.960 euros, mentres que para 2028 (de decembro de 2027 a abril de 2028) recóllese un gasto de 183.480 euros. O contrato terá unha duración inicial de dous anos, con posibles prórrogas.

A empresa adxudicataria do servizo, Coregal Parques e Xardíns SL, ten que presentarlle ao Concello de Ames unha planificación da totalidade dos traballos a desenvolver. O Concello de Ames poderá introducir modificacións en dito plan, con relación ao alcance, secuencia e ordenación de operacións que permitan mellorar a calidade dos traballos conseguidos sempre e cando, non excedan do alcance orzamentario previsto para a execución do traballo.

Equipo de tres ou cinco persoas

O servizo contará cun equipo mínimo de tres persoas traballando simultaneamente durante 8 meses do ano, pasando a ser cinco traballadores/as durante o período estival (catro meses ao ano). Estes traballos inicialmente serán realizados en xornada partida de mañá e tarde, aínda que se poida estudar a posibilidade de realizalos en xornada continua, pero cumprindo o horario de 8 horas diarias (40 horas semanais).

Actuarase nas 11 parroquias do concello de Ames e nun total de 107 núcleos rurais. Os traballos de limpeza e mantemento dos accesos e interiores dos núcleos rurais executaranse en Agrón (14 núcleos); na Ameixenda (8 núcleos); Ames (18 núcleos); Biduído (13 núcleos); Bugallido (11 núcleos); Covas (8 núcleos); Lens (2 núcleos); Ortoño (15 núcleos); Piñeiro (6 núcleos); Tapia (3 núcleos); e Trasmonte (9 núcleos).

Centros especiais de emprego de iniciativa social

Este novo contrato foi adxudicado a un centro especial de emprego de iniciativa social. Cómpre salientar a aposta do Concello de Ames pola economía social e os centros especiais de emprego, xa que en 2023 o Concello de Ames adxudicou o contrato de mantemento de zonas verdes á empresa Coregal Parques e Xardíns SL, por un importe de 1.531.860 euros (IVE incluído). Agora dita empresa tamén resulta adxudicataria deste novo contrato.

Neste senso, tamén hai que destacar que o Concello de Ames foi premiado en novembro de 2023 co Premio Cegasal á Administración Local debido a súa longa traxectoria apostando pola economía social e os centros especiais de emprego de iniciativa social.

Ademais, recentemente, en xuño de 2025 o presidente de Cegasal, Mino Martínez Lago, visitou á Casa do Concello, en Bertamiráns, para manter unha xuntanza no salón de Plenos co alcalde e cos concelleiros e concelleiras do grupo de goberno. Mino Martínez puxo a Ames como exemplo a seguir por outras administracións en prol da integración laboral de persoas con diversidade funcional.