Padrón organiza a “Caravana da Irmandade” a Arjonilla para celebrar o seu irmandamento

• A veciñanza padronesa poderá viaxar de xeito individual ao municipio xinenense os días 26 e 27 de setembro
• A programación, incluída a comida de fraternidade, está coordinada polos concellos
• O prazo de inscrición está aberto ata o 8 de setembro na Oficina de Turismo de Padrón
• Unha representación da corporación municipal, encabezada polo alcalde Anxo Arca, tamén participará na viaxe
• O obxectivo é fortalecer os seus lazos de amizade e cooperación cultural arredor da figura de Macías o Namorado

Padrón. 20-8-2025.- O Concello de Padrón organiza os días 26 e 27 de setembro a Caravana da Irmandade a Arjonilla, unha viaxe coa que se quere celebrar e consolidar o irmandamento asinado entre ambos municipios o pasado 4 de xullo arredor da figura literaria de Macías o Namorado, trobador medieval nacido en Padrón e falecido en Arjonilla.

A iniciativa supón unha viaxe individual da veciñanza padronesa cara ao municipio xienense, símbolo de unión e amizade entre pobos. Cada persoa parte libremente para rematar co programa común de actividades que teceron os seus concellos. A Oficina de Turismo de Padrón prestará asesoramento a todos os padroneses e padronesas que desexen tomar parte nesta experiencia cultural única.

Unha representación da corporación municipal, encabezada polo alcalde Anxo Arca, tamén formará parte da comitiva padronesa nesta viaxe, reforzando así o vínculo institucional entre ambos concellos.

Programa de actividades

O venres 26 de setembro está previsto o acto oficial de irmandamento en Arjonilla, seguido dunha visita ao Palacio Marqués de la Mercé e dunha comida institucional. Pola tarde, as persoas participantes coñecerán a Almazara García Morón, onde se realizará unha cata de aceite, e disporán de tempo libre para gozar do Mercado medieval de Arjonilla.

O sábado 27 de setembro o programa inclúe unha visita guiada polo patrimonio histórico-cultural de Arjonilla, así como un obradoiro artesanal de cerámica no taller de Manuel Bejarano Zafra. A xornada rematará de novo no Mercado Medieval, que ambientará as rúas da vila.

Prazo e inscricións

O prazo de inscrición remata o luns 8 de setembro. As persoas interesadas deben dirixirse á Oficina de Turismo de Padrón (Avda. Compostela s/n, 15900 Padrón), chamar ao teléfono 646 593 319 ou enviar un correo a: turismo@padron.gal.

Un proxecto de irmandade cultural

O irmandamento entre Padrón e Arjonilla foi rubricado o pasado mes de xullo polos alcaldes Anxo Arca e Luis Miguel Carmona como un acto de compromiso cultural e de posta en valor dun legado histórico e literario compartido.

Durante aquel acto, celebrado en Padrón, ambos rexedores destacaron que a figura de Macías o Namorado actúa como “ponte entre os dous pobos” e que esta unión servirá para “seguir cultivando a amizade sincera, a cultura e o respecto mutuo”.

Con esta Caravana da Irmandade, o Concello de Padrón busca implicar á súa veciñanza neste proxecto común, reforzando a cooperación cultural e social entre as dúas vilas.