A Casa das Máquinas convertese nun novo centro sociocultural

A apertura da Casa das Máquinas foi tamén, tal e como explicou Xan Duro, un acto «para recuperar a memoria de barrio, porque a rehabilitación do edificio é unha magnífica oportunidade para achegarnos á historia do edificio, que representa a chegada da modernidade a Compostela e da feminización do traballo, nos que Galeras tivo tanta importancia». Sobre esas cuestións reflexionaron Encarna Otero Cepeda e Xoan Carmona Badía, nun coloquio sobre a historia do barrio e a súa vinculación co Sarela. O acto contou ademais, coa animación do grupo Pistacatro.

Un espazo aberto á veciñanza

A Casa das Máquinas empregarase a partir de agora como centro sociocultural e poderá acoller actividades das distintas asociacións e colectivos do barrio de Galeras. O concelleiro Xan Duro agradeceu o traballo de todas as persoas e institucións «que fixeron posible que hoxe contemos con este novo equipamento, desde o Concello de Santiago desde hai xa varios anos, e desde a Deputación da Coruña, que contribuín ao financiamiento da súa rehabilitación». O concelleiro de Centros Socioculturais explicou que «a Casa das Máquinas fica desde hoxe ao servizo do barrio de Galeras, do conxunto do tecido asociativo de Santiago, co compromiso do Concello de seguilo dotando do equipamento e do mobiliario preciso para que este espazo sexa un novo referente na cidade e que sexa catalizador de tantas e tantas propostas e iniciativas que existen en Compostela».

Pola súa banda, a alcaldesa lembrou tamén a historia do edificio da Casa das Máquinas e o protagonismo que a luz tén tamén na historia de Santiago «desde a lenda que fala das orixes de Compostela e das luces no monte Libredón,pasando por grandes fitos como que a que hoxe é a facultade de Xeografía e Historia foi o primeiro edificio público iluminado no Estado español cun arco voltaico, e ata a propia orixe do edificio hoxe rehabilitado, construido por Cooperativa Santiaguesa como reacción ao monopolio da electricidade».

Recuperar espazos públicos e darlles outra vida

Goretti Sanmartín incidiu tamén en que «a Casa das Máquinas súmase hoxe a unha longa lista de edificios rehabilitados e postos ao servizo da veciñanza, moitos deles para darlles outra vida dentro da rede de Centros Socioculturais, como son as antigas escolas de Figueiras, Laraño ou San Lourenzo, ou a vella estación de Cornes». Nesa liña, a alcaldesa deulle a benvida ao inmoble de GAleras «a unha nova etapa na que mantén a súa función de servizo público, de acubillo da veciñanza, mais tamén de visitantes, en canto que espazo de usop olivalente, dedicado á cultura, á aprendizaxe e ao lecer colectivo»

O edificio, un dos mellores exemplos da arquitectura industrial moderna da cidade, foi unha das infraestruturas que nos anos oitenta quedou incorporada ao primeiro catálogo de construcións protexidas de Santiago fóra da cidade histórica. E así, con esa protección, se mantivo nos PXOM de 1989 e de 2007, cando o Concello se fixo coa propiedade do edificio, que pertencía a Unión Fenosa.

Nas obras de rehabilitación do espazo, que se realizaron en tres fases e nas que se investiron máis de 400.000 euros, participou tamén a Deputación da Coruña, cunha achega de algo máis de 200.000 euros.