O ChichaFest converterá a Sala Capitol nun escaparate do talento emerxente galego

• Onda Chicha, a iniciativa impulsada por Chichalovers e Radio Líder Santiago para apoiar novas bandas e proxectos musicais, celebrará o 13 de xuño unha gran final con actuacións de Fuego Lolita, WhyNot? e Skadelos, gastronomía local e un premio profesional para a banda gañadora

A Sala Capitol de Santiago acollerá o próximo 13 de xuño o Chichafest, a gran final da primeira edición do Onda Chicha, un proxecto nacido para impulsar e dar visibilidade ao talento musical emerxente galego.

O festival reunirá sobre o escenario a Fuego Lolita, WhyNot? e Skadelos, as tres bandas finalistas seleccionadas tras varios meses de concurso entre proxectos procedentes de diferentes puntos de Galicia. Ao longo deste tempo, Onda Chicha consolidouse como unha plataforma de apoio á creación musical emerxente, xerando unha comunidade arredor da cultura, a música e o territorio.

A xornada arrancará ás 13:00 horas en formato sesión vermú e converterá a Sala Capitol nun punto de encontro para artistas, público e profesionais do sector musical. Ademais dos concertos, un xurado profesional escollerá durante o evento a banda gañadora desta primeira edición, que recibirá como premio a gravación dun EP nos estudos Garaxeland, unha oportunidade destinada a impulsar o desenvolvemento profesional do proxecto seleccionado.

Máis aló da música, o Chichafest incorporará unha ampla proposta gastronómica centrada no produto local e de proximidade. O espazo gastro estará protagonizado por produtores participantes en A Paisaxe que Sabe, iniciativa da Deputación da Coruña que promove a excelencia agroalimentaria da provincia. Os asistentes poderán degustar diferentes elaboracións e produtos de quilómetro cero nun ambiente pensado para celebrar a cultura galega en todas as súas expresións.

O festival contará tamén cunha barra especial de Chichalovers, que presentará unha edición exclusiva da súa coñecida “chicha” creada especificamente para a ocasión, ademais doutras propostas gastronómicas e diversas sorpresas para o público asistente.

O CHICHAFEST servirá tamén para celebrar o segundo aniversario de Chichalovers, entidade impulsora do proxecto Onda Chicha, nun evento que busca consolidarse como unha cita de referencia para a música emerxente e a promoción do produto local galego.

As entradas xa están dispoñibles a través da web da Sala Capitol.

PROGRAMA

12:30 h – Apertura de portas
13:00 h – Presentación do Onda Chicha
13:30 h – Sesión vermú e espazo gastronómico
15:00 h – Concertos de Fuego Lolita, WhyNot? e Skadelos
18:00 h – Fin do evento