Recantos sae dos estudios de televisión e percorre Galicia para atopar os artistas do futuro

RECANTOS REINVÉNTASE PARA BUSCAR O TALENTO MUSICAL DE GALICIA DA MAN DE DUARTE GALBÁN

O universo de Recantos inicia unha nova etapa. O histórico concurso musical integrado en Luar dará un salto de formato para achegarse ao territorio e descubrir novas voces galegas a través dunha serie de castings televisados que percorrerán diferentes puntos do país. Á fronte desta nova aventura estará o presentador Duarte Galbán, que exercerá como anfitrión dun proxecto que pretende converter os teatros galegos no primeiro escenario de futuras figuras da música.

Durante a entrevista, Galbán destacou a importancia dunha iniciativa que busca ofrecer unha oportunidade real a quen sempre soñou con cantar diante do público. “Recantos é unha plataforma marabillosa para todos aqueles que queiran dar o paso de cantar na casa, na ducha ou no coche a subirse a un escenario”, afirmou.

O novo programa, baixo o nome de Recantos O Casting, visitará oito localidades galegas antes dunha gran gala final prevista para Santiago de Compostela. O obxectivo será seleccionar os participantes da próxima edición de Recantos dentro de Luar, pero tamén dar visibilidade a moitos artistas que ata agora nunca tiveron a oportunidade de mostrarse ante as cámaras.

“Buscamos xente totalmente diferente. Dános igual o estilo musical. Queremos persoas con ganas de cantar e de vivir esta experiencia”, explicou Galbán, incidindo na vocación aberta e inclusiva da proposta.

O presentador revelou que estará acompañado por un xurado formado por figuras coñecidas do ámbito musical e audiovisual galego. Entre elas destacan a cantante Pili Pampín, o produtor musical Cristian Genia e o director de casting Manu Turnes. O seu papel será avaliar as actuacións e acompañar aos aspirantes nun proceso que quere ir máis alá da simple competición.

“Vou estar alí para coidalos, para recibir ás súas familias e para coñecer as historias que hai detrás de cada participante”, sinalou Galbán. “Queremos saber cando se deron conta de que había un artista na casa e compartir esa emoción coa audiencia”.

Un dos aspectos diferenciais desta nova fórmula será precisamente a dimensión humana. O equipo quere achegarse ás historias persoais dos concursantes e ás súas contornas familiares, construíndo un relato máis próximo e emocional arredor do talento musical galego.

Galbán insistiu en que non existen límites de idade nin de experiencia. “Que tes 18 anos e dubidas se podes dedicarte á música? Este é o teu sitio. Que tes 50 ou 60 e sempre soñaches con cantar? Este tamén é o teu sitio”.

O percorrido arrancará o 11 de xuño en Viveiro e continuará por localidades como O Barco de Valdeorras, Celanova, Ferrol, Cangas do Morrazo, Rianxo e Lugo, entre outras. As persoas interesadas deberán inscribirse previamente a través do correo electrónico habilitado pola organización ou do número de contacto facilitado polo programa.

O novo formato tamén pretende adaptarse ás esixencias actuais da televisión e da industria musical. “Agora temos a responsabilidade de emitir un programa de máxima calidade nunha franxa de audiencia moi importante”, explicou. “Os castings tamén servirán para que moita xente poida coñecer outros perfís artísticos, incluso daqueles que finalmente non entren en Recantos”.

Durante a conversa, Duarte Galbán reivindicou ademais o gran momento que vive a cultura galega. Para el, Galicia está atravesando unha etapa histórica no ámbito creativo e musical.

“Creo rotundamente que estamos vivindo un momento histórico para Galicia”, afirmou. “De súpeto decatámonos de que facer cousas en galego e desde aquí tamén está de moda”.

Nesa mesma liña, defendeu a importancia da lingua como ferramenta de proxección artística. “Con galego podemos chegar ao fin do mundo”, asegurou, ao tempo que subliñou a necesidade de que as novas xeracións comproben que é posible desenvolver unha carreira musical empregando a lingua propia.

A ilusión xerada arredor do proxecto é, segundo explicou, unha das maiores satisfaccións para o equipo organizador. “É tan bonito ver as mensaxes e a ilusión coa que fala a xente disto que estamos moi contentos”, recoñeceu.

O presentador tamén destacou que o paso por Luar supón unha experiencia transformadora para moitos artistas. “Que che abran as portas dun sitio cando non es ninguén é algo que non vas esquecer na túa vida”, afirmou, lembrando a importancia que ten o programa na traxectoria de numerosos músicos galegos.

Ademais da súa implicación neste novo proxecto, Duarte Galbán afronta outro momento destacado da súa carreira profesional. Nos próximos días viaxará a Belfast tras ser nomeado aos Celtic Media Awards como mellor presentador do ano grazas ao programa Gaña a túa aldea.

“Non contaba con isto e estou moi agradecido”, confesou. “Vou alí coa ilusión de aprender, coñecer profesionais de moitos anos de experiencia e representar tamén a televisión galega”.

Mentres tanto, toda a súa atención está centrada nun desafío que considera fundamental para o futuro da música galega. “Hai un talento inmenso nesta terra e moitas veces está oculto”, concluíu. “O que queremos é ofrecerlle un escenario, unha oportunidade e a confianza necesaria para que poida brillar”.