O alcalde debulla na radio os grandes proxectos en marcha —2 millóns para completar o saneamento, novas Casas do Maior e melloras en infraestruturas— mentres anima a participar na Festa da Filloa e no Entroido de Sergude
Líder Redacción
14 de febrero de 2026 a las 08:04
O alcalde de Boqueixón, Ovidio Rodeiro, fixo balance da actualidade municipal nunha entrevista radiofónica na que combinou reivindicación institucional, datos de investimento e unha firme defensa das tradicións locais. Nun momento clave do calendario, coa Festa da Filloa de Lestedo en marcha e ás portas do Entroido de Sergude, Rodeiro puxo cifras e prazos sobre a mesa para defender que o Concello vive “unha das etapas de maior impulso inversor da súa historia recente”.
“Estamos traballando para elevar o saneamento a case o 100% das aldeas de todo o Concello”, afirmou con rotundidade, cualificando este obxectivo como “posiblemente o maior reto ao que pode enfrontarse un alcalde nun concello rural”.
Festa da Filloa de Lestedo: tradición, recoñecemento e ambición renovada
“Cando tes un recoñecemento a nivel nacional, o que se acredita é que hai tradición, continuidade e un traballo detrás”, subliñou, felicitando expresamente aos homes e mulleres da parroquia de Lestedo.
Rodeiro lembrou que a programación inclúe showcookings, a Festa da Filloiña, a feira dominical e o día grande o 22, facendo un chamamento á participación: “Vai ser un gran día e parece que o tempo vai estar un pouco máis a favor”.
En clave gastronómica, reivindicou a versatilidade do produto estrela: “A filloa marida con todo”, dixo, lembrando que hai opcións doces, salgadas, para celíacos e con múltiples recheos.
Xenerais do Ulla en Sergude: identidade, sátira e canteira
Destacou tamén o relevo xeracional: “Cada vez máis as escolas están incorporando esta celebración aos nenos máis pequenos”, o que garante continuidade a unha tradición singular da comarca do Ulla.
Sobre a crítica e a retranca propias dos Xenerais, mostrou deportividade: “Toda leña que poida andar hai que tomala como o que é: un día de festa”. E animou á asistencia: “O domingo, a partir das sete da tarde, que acudan ao campo da festa de Sergude, que vai estar cheo de diversión e bo facer”.
2 millóns para saneamento e aposta polos servizos básicos
Máis alá do calendario festivo, o alcalde detallou un amplo paquete de investimentos. Entre eles:
2,4 millóns de euros en máis de 10 quilómetros de sendas.
1,6 millóns no cambio integral de luminarias.
2 millóns na primeira EDAR municipal.
400.000 euros en melloras de abastecemento e cinco fosas comunitarias.
Un plan global que suma arredor de 2 millóns adicionais para completar o saneamento en case todas as aldeas.
“Creo que pode ser inédito nos concellos rurais de España lograr case o 100% do saneamento en todas as casas”, asegurou.
Tamén anunciou que o Concello asumirá o baleirado das fosas que aínda queden fóra da rede: “O propio Concello vai asumir o servizo de vaciado desas fosas e trasladalo á EDAR de Sergude”.
Estradas, burocracia e tempos administrativos
Rodeiro recoñeceu as dificultades que implica xestionar unha ampla rede viaria rural. Hai actualmente un millón de euros en contratación para asfaltos e outros 300.000 planificados, ademais dun posible novo millón con fondos propios.
“Intentamos anticiparnos, pero a administración é garantista e iso leva tempo”, explicou, sinalando que permisos de Patrimonio, Augas de Galicia ou outras administracións poden atrasar actuacións urxentes.
Recibe las noticias en tu correo.
