Santiago de Compostela, 29 de agosto de 2025. O Grupo Municipal Socialista denuncia a falta de previsión do goberno da alcaldesa nacionalista Goretti Sanmartín na posta a punto dos centros de educación infantil e primaria de cara ao inicio do curso escolar.
Segundo trasladaron as traballadoras do servizo ao Grupo Municipal, as tarefas de limpeza xeral, que deberían realizarse durante o mes de agosto segundo recolle o prego do contrato, non comezarán ata o 1 de setembro.
Ademais dos prazos axustados para realizar as limpezas xerais dos centros, o feito de que nalgúns deles se estean a acometer traballos de reparación e mantemento supoñen unha carga de traballo desproporcionada para as traballadoras quen se ven na obriga de redobrar esforzos.
Para as e os socialistas de Santiago de Compostela, resulta inadmisíbel que, a poucos días da apertura das aulas, non exista un reforzo suficiente do servizo de limpeza. A improvisación do executivo local terá como resultado que nenos e nenas se atopen con colexios con po, restos de obra e sen as condicións mínimas de hixiene e salubridade que deberían estar garantidas.
Esiximos que o goberno municipal actúe con responsabilidade e reforce de inmediato os equipos de limpeza, asegurando que todos os centros educativos estean preparados a tempo para acoller á comunidade escolar.
Recibe las noticias en tu correo.
