O éxito dos bocatas de chicharróns e chourizo de Chichalovers medra: «Abriremos en A Coruña e Ourense»

Redacción, 8 de abril de 2025 – No corazón de Santiago, na Porta do Camiño , un pequeno local de apenas 16 metros cadrados está escribindo unha das historias de éxito gastronómico máis sorprendentes de Galicia. Chichalovers, especializado en bocatas de chicharrón e chourizo, conseguiu en só dez meses o que moitos negocios non logran en anos: converterse nun fenómeno social, cultural e culinario que traspasa fronteiras.

A idea naceu da unión de dúas tradicións familiares. Por unha banda, Darío, co seu legado gandeiro en Santa Comba e a súa carnizaría no Mercado de Abastos de Santiago; por outra, Graciela, proveniente dunha familia de hostaleiros con tres xeracións de experiencia. «Xuntamos dous legados: o da gandería e o da hostalaría. Queríamos recuperar o chicharrón, un produto case perdido, e poñelo no século XXI», explica Graciela con paixón.

O resultado é unha carta minimalista pero contundente: bocatas onde o chicharrón e o chourizo son os indiscutibles protagonistas, elaborados con materias primas de proximidade e un toque de innovación. «Non é un acompañamento, é a estrela. E a xente responde: desde nenos até xente maior de 80 anos, todos repiten», comenta.

Da rúa ao «Solete Repsol» en cinco meses

O crecemento de Chichalovers foi meteórico. Aos cinco meses da súa apertura, recibiron o Solete Repsol, un recoñecemento que lles colleu por sorpresa. «Non o esperabamos. Pedíronnos fotos para a prensa e, de súpeto, dinos que era para o galardón. Foi unha alegría inmensa», recorda Graciela. Este premio non só validou a súa aposta pola calidade, senón que acelerou os seus plans de expansión.

Hoxe, o local xa non se limita ao seu espazo físico. Participan en feiras, festivais e eventos deportivos, levando o sabor do chicharrón a novos públicos. «Imos a todos lados: se hai un concerto ou un partido, alí estamos. Queremos que a xente asocie o chicharrón con felicidade», afirma.

Un dos aspectos máis chamativos de Chichalovers é a súa capacidade para sorprender. Turistas de toda España e do estranxeiro achegan curiosos ao ver os seus bocatas. «Os latinoamericanos flipan. Preguntan: ‘Isto qué é?’. Despois explícaslles que é o chicharrón da nosa terra e quedan toleados», relata entre risas.

As redes sociais foron clave na súa estratexia. Os seus «Bocatas do Chef», unha iniciativa mensual onde cociñeiros galegos de prestixio como Iván Domínguez (Nado) ou Benedita Elisa crean bocatas exclusivos, viralizáronse. «É máxico ver a chefs con estrelas Michelin deseñando para nós. Eles divírtense, e nós aprendemos», destaca Graciela.

O futuro: Galicia como punto de partida

Cunha proxección imparábel, Chichalovers xa mira máis aló de Santiago. A Coruña e Ourense son os seus próximos obxectivos, aínda que sen présas. «Queremos facelo ben. Analizaremos o primeiro ano completo (ata xuño) e despois decidiremos», explica. Eso si, sempre con xestión propia: «De momento, queremos controlar cada paso. Isto é o noso bebé».

Mentres, en Porta do Camiño, a cola para probar os seus bocatas segue crecendo. «O máis bonito é ver a xente maior pedindo o seu ‘take-away’. Din: ‘O médico non me deixa, pero hoxe compro un’», comenta emocionada.

Chichalovers é máis que un local de bocatas: é un caso de éxito que combina tradición, innovación e marketing intelixente. Como resume Graciela: «Isto non é sorte. É traballo, moito esforzo e crer no que fas. E, sobre todo, saber que o produto galego é marabilloso».

A entrevista completa, no seguinte enlace.