Muros mantén o apoio ás Carrilanas malia as diferenzas coa Asociación

O pasado 24 de febreiro, a Asociación de Carrilanas de Esteiro remitiu ao Concello un escrito no que solicitaba numerosa documentación e información, outorgando un prazo improrrogable de 10 días para a súa resposta. Segundo indica o goberno local, parte da información requirida non é relevante para a tramitación do convenio de colaboración, ademais de que o prazo estipulado pola Asociación é moi inferior ao que marca a lexislación.

Co obxectivo de avanzar na documentación e nos permisos necesarios para a celebración da festa, o Concello de Muros propuxo unha reunión coa Asociación de Carrilanas de Esteiro. Porén, a directiva da entidade declinou a invitación.

Desde o Concello lémbrese que en 2024 a organización das Carrilanas contou cunha subvención de 25.000 euros a través da área de Cultura, ademais do apoio de cinco traballadores da Brigada de Obras Municipal durante a semana previa ao evento. Tamén se facilitou material de obra e construción, permitiuse a poda do recinto do Artón e realizouse a xestión dos residuos xerados. Ademais, durante os días da festa, o Concello puxo a disposición da organización os efectivos da Policía Local, o GES de Muros e Protección Civil.

A alcaldesa de Muros, María Lago, asistiu en febreiro á última asemblea da Asociación de Carrilanas de Esteiro, onde reafirmou o compromiso municipal coa tramitación dos permisos necesarios para a celebración da edición de 2025. A Concellería de Cultura, pola súa banda, manifestou explícitamente o seu apoio ao evento.

O Concello asegurou descoñecer os motivos exactos do comunicado feito público pola Asociación na tarde de onte e insistiu na súa vontade de manter o diálogo coa organización para garantir que Esteiro acolla un ano máis as Carrilanas no verán de 2025.