Mercamelide regresa o 21 e 22 de febreiro con preto de 30 comercios participantes
O Mercamelide de inverno volverá converter a vila de Melide nun gran escaparate comercial durante a fin de semana do 21 e 22 de febreiro, cunha edición que chega con forza ao duplicar o número de establecementos participantes, ata acadar case 30 comercios locais.
Líder Redacción
9 de febrero de 2026 a las 10:14
A presentación oficial do evento tivo lugar coa presenza do alcalde, José Manuel Pérez, do concelleiro de Comercio, Xosé Igrexas, así como de representantes do comercio da localidade, que deron a coñecer o cartel anunciador desta nova edición.
Un ano máis, o Pazo de Congresos acollerá durante toda a fin de semana un amplo espazo de compra no que a veciñanza e as persoas visitantes poderán adquirir produtos de primeira calidade, procedentes do comercio local e a prezos moi competitivos, reforzando así o consumo de proximidade.
Como complemento á oferta comercial, o Mercamelide contará tamén con animación infantil dirixida a nenos e nenas a partir dos 4 anos. Este servizo funcionará en horario de 11:00 a 14:00 horas pola mañá e de 16:00 a 20:00 horas pola tarde, facilitando que as familias poidan realizar as súas compras con maior comodidade.
A actividade está organizada en colaboración coa Asetem, reafirmando o compromiso do Concello co impulso e dinamización do comercio local durante a tempada de inverno.
