Brión inicia a repoboación parcial da Carballeira de Santa Minia

 

 

Retiráronse as árbores analizadas e que estaban enfermas e sen cura posible. Ao longo desta semana procederase ao baleirado da terra contaminada na zona sur da carballeira e ao seu recheo por terra nova

Se o tempo o permite, ao longo da próxima semana procederase á plantación de oito exemplares de carballo, de tres metros de altura

O Concello de Brión vén de iniciar os traballos de repoboación parcial da Carballeira de Santa Minia, autorizados o pasado mes de febreiro pola Dirección Xeral de Patrimonio Cultural da Xunta de Galicia. Así, entre este luns e martes procedeuse á retirada dunha ducia de árbores emprazadas na zona sur do predio, na contorna da Casa da Cultura brionesa, e que estaban afectadas por distintos fungos, entre eles Armillaria mellea, unha enfermidade mortal para os carballos e que non ten cura posible.

O alcalde de Brión, Pablo Lago, estivo supervisando os traballos de retirada dos exemplares enfermos e adianta que “mañá mércores comezaremos coa retirada da terra, que tamén está contaminada por Armillaria, e a súa reposición con terra nova ao longo desta semana. Se o tempo o permite, a nosa intención é plantar oito exemplares de carballo duns 3 metros de altura ao longo da próxima semana”. Uns carballos que o Concello de Brión xa ten reservados dende hai un par de meses e que serán plantados de xeito que teñan luz suficiente para medrar e fagan copas abertas.

Neste sentido, Pablo Lago remarca que “dende o Concello estamos seguindo estritamente os prazos que nos marcan os técnicos e especialistas para afrontar esta situación, xa que non existe ningún tratamento para curar a Armillaria mellea que tiñan estas árbores”. Unha enfermidade que provoca a putrefacción do sistema radicular e, en consecuencia, a morte da árbore por inanición ao non poder absorber nin a auga nin os nutrintes do chan.

Como se trata dunha enfermidade que se transmite polo solo ás árbores próximas, o primeiro paso recomendado polos técnicos foi a retirada dos exemplares que a Estación Fitopatolóxica do Areeiro determinou que estaban enfermas e sen cura posible. O segundo paso será a retirada da terra sobre a que se asentaban os carballos, tamén contaminada por Armillaria mellea, e a súa substitución por outra sobre a que se plantarán os novos carballos.

Unha vez plantados os novos exemplares, procederase a analizar o resto de exemplares da carballeira para coñecer o seu estado fitosanitario e determinar os seguintes pasos a seguir. A forma na que está distribuída a carballeira de Santa Minia permite que ambos procedementos (plantación das novas árbores e análise das demais) se poida realizar en condicións de seguridade para as árbores.

E é que aínda que a Armillaria mellea é unha enfermidade que se transmite polo solo ás árbores próximas, os oito novos exemplares estarán na zona sur da carballeira, que está separada do resto do predio por un sumidoiro. Polo tanto, aínda que algunha das outras árbores non analizadas estivera tamén enferma, non afectaría ás novas ao non compartir o mesmo terreo.

Finalmente, esta mañá recolléronse tamén as partes dos carballos que serán entregados ao escultor e artista Camilo Seira (Rois) para a elaboración dun traballo artístico. Unha obra realizada a partir das cortizas dalgúns dos exemplares e que será exposta no seu momento nun edificio municipal como memoria da carballeira centenaria de Brión. Desta forma, o Concello de Brión dá resposta a unha das propostas realizadas durante as reunións abertas á veciñanza.