Radio Líder Santiago continúa a consolidar a súa presenza nas redes sociais cun novo impulso nos seus datos dixitais. Os contidos publicados en Facebook e Instagram acadaron preto de 5,4 millóns de visualizacións nos últimos 28 días, confirmando a tendencia ascendente da emisora baixo a dirección do grupo Dezasete Media, cando se cumpren algo máis de dous anos desta nova etapa de xestión.
Líder Redacción
3 de marzo de 2026 a las 00:48
Facebook medra un 35,4 % e supera os 3,7 millóns de visualizacións
No caso de Facebook, a emisora rexistrou 3,7 millóns de visualizacións, o que supón un incremento do 35,4 % respecto ao período anterior. As interaccións co contido tamén medraron de forma destacada, ata as 30.300, cun aumento do 33,4 %.
A comunidade continúa ampliándose, con 1.300 novos seguidores (+8,8 %), mentres que os clics no enlace acadaron os 10.700.
Se se comparan estes datos cos publicados no pasado mes de xaneiro —cando Facebook superaba os 2,4 millóns de visualizacións (+9,7 %) e as interaccións medraban un 27,3 % ata as 22.300—, obsérvase unha clara aceleración do crecemento tanto en alcance como en participación.
Instagram mantén a tendencia positiva e dispara as interaccións
En Instagram, os contidos de Radio Líder Santiago acadaron 1,7 millóns de visualizacións, cun incremento do 10,8 %. O dato máis salientable está nas interaccións co contido, que se elevaron ata as 68.100, cun espectacular aumento do 51,2 %.
A conta sumou 805 novos seguidores (+10 %) e rexistrou 784 clics no enlace (+7,1 %).
En comparación co mes de xaneiro, cando Instagram superaba os 1,3 millóns de visualizacións (+39,1 %) e as interaccións se disparaban máis dun 200 % ata as 43.800, a rede social consolida agora un volume máis elevado e sostido de participación, cun crecemento porcentual máis moderado pero sobre unha base moito maior.
Estratexia dixital consolidada
Estes resultados reflicten a consolidación da estratexia dixital desenvolvida por Radio Líder Santiago nesta nova etapa, cunha aposta decidida por contidos informativos, entrevistas, vídeos de actualidade e pezas de impacto social que conectan cunha audiencia cada vez máis ampla e participativa.
A evolución dos datos confirma non só un aumento do alcance, senón tamén unha maior implicación da comunidade nas distintas plataformas, reforzando o posicionamento da emisora como referente informativo tamén no ámbito dixital.
Recibe las noticias en tu correo.
