As II Xornadas de Emerxencias e Seguridade traen a Teo espectaculares simulacros

A explanada da Casa Común de Oza será o escenario de múltiples actividades, tales como talleres, xincanas, xogos e demostracións de medios, destinadas a todo o público, con especial atención á cativada. Durante a xornada, poderanse coñecer de preto os equipos e o traballo dos distintos corpos de emerxencia.

As actividades estarán divididas en catro categorías principais: Forzas e Corpos de Seguridade, con participación da Policía Local de Teo, Policía Nacional e Autonómica, Garda Civil, Garda Nacional Republicana de Portugal, Gendarmería Nacional Francesa e militares do Tercio Norte de Ferrol; efectivos sanitarios, como o 061, Cruz Vermella e Protección Civil de Teo; efectivos de rescate e emerxencias, con representación dos servizos municipais de emerxencias de Vilagarcía de Arousa e Teo, Salvamento Marítimo e Fuego y Mar; e finalmente, aeronaves de emerxencias, que inclúen helicópteros do 061, da Garda Civil e de loita contra incendios forestais.

Entre as actividades destacadas figuran as demostracións de unidades caninas da Policía Nacional, previstas para arredor das 12.00 horas do mediodía, e do Exército, que realizará unha demostración de defensa e ataque. Pola tarde, cara ás 17.00 horas, levaranse a cabo un simulacro de incendio en plataforma elevada e outro dun accidente de circulación entre dous turismos e unha cisterna de mercadorías perigosas. A xornada concluirá cunha festa da escuma para a cativada presente.

Lucía Clavo de Uz subliñou a importancia desta xornada para concienciar á cidadanía sobre o traballo dos corpos de emerxencia e a súa coordinación, ademais de ser unha oportunidade para que os máis pequenos aprendan e disfruten dun día repleto de actividades.

A entrevista completa, no seguinte enlace.