As Festas do Entroido de Santiago comezan este sábado co desfile do Meco e o pregón do Coro da Ra

O desfile do Meco, obra do artista José Manuel Méndez, que nesta ocasión representa o Mercosur sentado sobre Galicia esmagándoa, parte ás oito da tarde deste sábado 14 de febreiro da praza de Cervantes para percorrer a rúa Nova e a rúa do Vilar ata chegar á praza do Toural.

Unha vez subido o Meco ao balcón do Pazo de Bendaña, sobre as oito e media, dará inicio o pregón. Será o Coro da Ra quen inaugure estas Festas do Entroido 2026 e segundo avanzou o seu director, Ramón Bermejo, farao cun texto reivindicativo e transgresor salpicado de intervencións do coro.

Festival infantil de disfraces e animación nas rúas

O domingo 15 haberá animación de rúa ao longo de toda a mañá (de 10.30 a 14.00 horas) a cargo da comparsa Os Conformistas de Conxo,nun percorrido que irá do Centro de Maiores de Conxo á rúa do Franco. O mesmo día, o Obradoiro de Cultura Tradicional (OCT) Ultreia levará o Entroido de Mazaricos ás prazas do Toural (12.00 horas), Praterías (12.30h) e Cervantes (13.00h).

Na tarde do domingo o protagonismo será para os máis pequenos. A Sala Capitol acollerá o festival infantil de disfraces dende as 17.00 horas, con animación, baile, sorteo de agasallos e concurso de disfraces con premios xentileza de El Corte Inglés. A entrada é libre e poden participar rapazas e rapaces de ata 14 anos.

Tamén na tarde do domingo, a charanga Os Bandiños e a comparsa A Ruliña de Laraño animarán as rúas da zona vella.

O luns 16 a Charanga TNT e os Armatroulas de Laraño sairán ás 18.00 horas da praza Roxa para rematar en San Pedro ás 20.00 horas, mentres a Fanfarria Farruxa e a Comparsa de Maruxas e Coralias fan nun percorrido circular polo casco vello dende praza de Salvador Parga.

Martes de Entroido

O día central do Entroido, o martes 17 de febreiro, poderase gozar do agardado desfile nunha xornada que este ano é festiva. Carrozas, comparsas e charangas concentraranse ás 16.30 horas na avenida de Ferrol, para saír ás 17.30 horas en dirección a Frei Rosendo Salvado, praza Roxa, rúa da República do Salvador, rúa do Hórreo, rúa da Senra e avenida de Xoán Carlos I. O desfile conlevará modificacións no tráfico e no transporte urbano.

Rematado o percorrido, os participantes concentraranse na Sala Capitol, onde ás 20.00 horas actuará a Charanga Ardores e ás 21.00 horas comenzará a entrega de premios.

O día seguinte, o mércores 18, toca despedir o Entroido coa tradicional queima do Meco ás 21.00 horas na praza Roxa. Alí será levado pola comitiva fúnebre que sairá ás 20.00 horas do Toural, formada pola Agrupación Folclórica Cantigas e Agarimos, Os Conformistas de Conxo, A Ruliña de Laraño, Os Armatroulas de Laraño e a Charanga BB+.

Tamén o mércores, haberá bailes de Entroido de Muros, Noia e Costa da Morte, a cargo da Agrupación Folclórica Cantigas e Agarimos. Será ás 18.00 horas en Cervantes e ás 18.45 horas en Praterías.

Síguenos en WhatsAppNoticias directo a tu móvil

Unirse →

A programación complétase co Entroido tradicional dos Xenerais da Ulla que o sábado 21 protagonizará o desfile das Xeneraliñas da Semente e co Entroido de Conxo que ofrecerá unha amplo programa de actividade ao longo de toda esa xornada.

As Festas do Entroido de Santiago comezan este sábado co desfile do Meco e o pregón do Coro da Ra | vive.gal

As Festas do Entroido de Santiago comezan este sábado co desfile do Meco e o pregón do Coro da Ra

Últimas noticias

Suscríbete