A organización do San Xoán de Conxo reclama que o 24 de xuño sexa festivo en Santiago

A programación comezou o pasado xoves 13 coa elaboración dos mecos de San Xoán. As actividades principais terán lugar o domingo 23 de xuño cun roteiro guiado, xogos tradicionais, e a sardiñada ás 21:00 horas, acompañada de música cos grupos tradicionais Valentes de Conxo e Axeigo. A noite culminará coa cacharela pequena ás 22:30 horas, a historia das Meigas e o Aquelarre ás 23:00 horas, e a gran cacharela de San Xoán ás 24:00 horas, con queima do meco, fogos de luces, e rifas de sardiñas ou empanada a 2,5€.

Eva Armental destacou a importancia de preservar as tradicións do barrio mentres se procura un equilibrio co desenvolvemento e modernización de infraestruturas. Este ano, o meco das festas abordará un tema de actualidade que xerou debate na comunidade: o polémico carril bici que se planea construír a través de paraxes naturais de Conxo. Co lema «Carril bici sí, pero non así», o meco pretende reivindicar unha planificación máis consciente e respectuosa co medio ambiente, reflexionando sobre a necesidade de alternativas que eviten o impacto negativo nas zonas verdes do barrio compostelán.

Eva Armental aproveitou a súa intervención na radio local de Compostela para esixir ás autoridades locais para que o día de San Xoán sexa declarado festivo en Santiago de Compostela, tal como ocorre noutros lugares de Galicia e España. Armental argumentou que a festividade de San Xoán é unha celebración de gran importancia cultural e social para a comunidade compostelá, e que establecer o día seguinte como festivo permitiría aos veciños gozar plenamente das actividades sen preocuparse polas responsabilidades laborais ao día seguinte, promovendo así unha maior participación e preservación das tradicións locais.

A entrevista completa no seguinte enlace.