María Rozas: «A crise no PSOE obríganos a ser máis dialogantes, pero iso é a política»
Líder Redacción
21 de marzo de 2025 a las 20:46
Líder Redacción
21 de marzo de 2025 a las 20:46
Redacción, 21 de marzo de 2025.- Santiago de Compostela continúa apostando pola participación da xuventude nas decisións municipais. Así o explicou María Rozas, tenenta de alcaldesa e responsable de Xuventude, nunha entrevista en Radio Líder Santiago, onde puxo en valor o éxito dos orzamentos participativos e avanzou detalles da Factoría Moza, un novo espazo pensado para a mocidade da cidade.
Pero ademais dos temas xuvenís, a concelleira tamén abordou a situación política no Pazo de Raxoi tras as tensións no Partido Socialista, subliñando que o goberno local seguirá apostando polo diálogo para garantir a estabilidade da cidade.
Os orzamentos participativos da área de Xuventude, que contan cunha dotación de 100.000 euros, están a espertar un grande interese entre os mozos e mozas de Compostela. Segundo destacou Rozas, nesta edición presentáronse máis de 100 propostas en ámbitos moi diversos, como música, deporte, formación, saúde ou gastronomía.
«Ás veces temos estereotipos sobre a xuventude que non son certos. A realidade é que teñen intereses moi diversos e ganas de participar na vida municipal», afirmou a edil.
O proceso de votación segue aberto ata o luns 24 de marzo, e dende o Concello anímase á xuventude de entre 16 e 30 anos a participar a través da web decide.santiagodecompostela.gal ou nas mesas presenciais en facultades e institutos.
Entre as iniciativas que xa se puxeron en marcha grazas aos orzamentos participativos destaca o Cine ao aire libre na Alameda, que foi a proposta máis votada no ano pasado. Tamén se levaron a cabo ciclos de concertos, como o das Fillas de Cassandra na Sala Capitol, ou campañas de sensibilización sobre adopción de animais. «Chamoume a atención que unha das propostas máis votadas foron cursos de primeiros auxilios. Demostra que a xuventude está moi comprometida», engadiu Rozas.
Un dos grandes anuncios da entrevista foi a creación da Factoría Moza, un espazo que se ubicará na antiga estrutura do parque comarcal de bombeiros en Salgueriños. Con un orzamento de case 5 millóns de euros, este proxecto busca converterse nun punto de referencia para a mocidade de Santiago.
«A Factoría Moza será un espazo integral con auditorio, locais de ensaio, coworking, biblioteca, espazos para cultura urbana e mesmo unha radio e un podcast», explicou a concelleira.
O Concello xa solicitou fondos europeos para financiar o proxecto e espera unha resposta cara ao final do verán.
Rozas tamén destacou o papel da xuventude na cidade, especialmente a súa vinculación coa Universidade de Santiago de Compostela (USC). Un de cada cinco composteláns é estudante universitario, polo que «Santiago non se entende sen a súa xuventude», afirmou.
Ademais, fixo referencia á Gala do Deporte, que se celebrará o próximo luns, recoñecendo a importancia do deporte base e das disciplinas minoritarias como o hóckey ou a ximnasia rítmica.
A parte final da entrevista estivo marcada por unha pregunta política directa: como afecta ao goberno municipal a crise interna do Partido Socialista? Ante isto, María Rozas evitou entrar en confrontacións e apostou por unha mensaxe de estabilidade e responsabilidade. «Eu lamento o que está acontecendo no PSOE porque creo que dá unha imaxe da política que non é boa. Pero nós estamos aquí para traballar, para mellorar os servizos e impulsar proxectos para Santiago», respondeu con firmeza.
O actual goberno compostelán, formado por Compostela Aberta en coalición co BNG e con apoios puntuais do PSdeG, afronta unha situación de minoría que obriga a tecer alianzas constantes no pleno municipal. Non obstante, Rozas non ve isto como un problema, senón como unha oportunidade para facer unha política máis dialogante. «Sempre defendín que a política debe ser un espazo de diálogo. Ter que negociar cada proposta non é algo negativo, senón máis ben positivo e enriquecedor», asegurou.
A edil tamén descartou que os recentes acontecementos internos do PSdeG poidan supoñer unha ameaza inmediata para o goberno local. «Estou segura de que todos e todas seremos responsables. A cidade de Santiago está por riba de calquera outra cuestión», afirmou.
A crise do PSdeG, que provocou divisións e tensións entre os seus membros, podería alterar o equilibrio de forzas no Concello. Sen embargo, desde Compostela Aberta apostan por continuar na senda da estabilidade: «Nós imos seguir facendo o noso traballo, como ata agora, buscando acordos e apostando polo ben común da cidade», insistiu Rozas.
Con estas declaracións, a concelleira quixo trasladar unha mensaxe de tranquilidade e evitar especulacións sobre posibles cambios na gobernabilidade de Santiago. «O que nos interesa é Santiago e a súa xente. As loitas internas dos partidos son algo secundario para nós», concluíu.
A entrevista completa, no seguinte enlace.
Recibe las noticias en tu correo.
