VIDEO | O edil de Obras reitera o seu compromiso de diálogo coa veciñanza do Pombal

03/07/2024 O concelleiro de Obras, Xesús Domínguez, compareceu hoxe xunto co xefe de servizo de Proxectos e Obras, Antonio Ranedo, e o director facultativo da obra de reurbanización da rúa do Pombal, Pablo Blanco, para dar conta da primeira semana dos traballos. Este mércores, con preaviso, procedeuse a un corte de auga para executar un enganche de abastecemento co obxecto de garantir a subministración durante a duración dos traballos. O corte programouse dentro do tramo horario con menor afección para o conxunto da veciñanza e establecementos, evitando os ruídos e molestias que podería causar a execución destes traballos en horario nocturno, o que perturbaría o descanso de persoas residentes e clientes de hoteis e pensións.