Cerceda celebra a XXVI Festa do Cochiño coas actuacións de Olympus e La Misión

O evento ofrece cochiño, churrasco, polbo, música en directo, zona infantil, e un entorno único ao carón do parque acuático e do xardín botánico

Cerceda énchese este sábado 26 de xullo de sabor, tradición e festa coa celebración da 26ª edición da Festa Gastronómica do Cochiño, un evento que se consolida como unha das grandes citas do verán en Galicia. O alcalde, Juan Manuel Rodríguez, en conversa con Álvaro Veiga en Radio Líder Santiago, destacou a diversidade e atractivo do evento, que combina gastronomía, música, natureza e ambiente familiar. “Está todo preparado e encantado de que a xente nos veña visitar”, afirmou o rexedor.

A festa arrinca desde primeira hora da mañá, con ambiente xa dende as 11:00h, e as degustacións comezarán a partir das 14:00h. Os asistentes poderán saborear cochiño, churrasco, polbo e outros produtos galegos a prezos populares (14€ en venda anticipada). Ademais, haberá inchables de balde para a cativada entre as 15:30h e as 19:00h, creando un ambiente familiar e interxeracional.

“A climatoloxía semella que vai acompañar, así que esperamos unha xornada segura e festiva”, explicou Rodríguez, quen tamén puxo en valor o entorno privilexiado da celebración: o parque acuático de Cerceda, o xardín botánico e o paseo fluvial do río Cabancos. “O segredo do éxito é que cada quen pode disfrutar da festa á súa maneira”, afirmou o alcalde, aludindo á posibilidade de instalar carpas privadas ademais das zonas habilitadas para o público xeral.

A música tamén terá un papel protagonista, con actuacións durante o día a cargo de San Martiño de Cerceda, Faíscas da Pontraga e a Charanga Santa Compaña. Pola noite, a festa acada o seu punto álxido coas actuacións das orquestras Olympus e La Misión a partir das 20:00h. Como colofón, os fogos de artificio iluminarán o ceo de Cerceda ás 23:00h, pechando unha xornada chea de experiencias.

A nivel de participación, a expectación é alta: xa se levan máis de 800 racións vendidas por anticipado, pero a organización agarda unha afluencia moito maior. “Ese é un dato residual, porque moita xente decide asistir no propio día e outras tantas veñen con carpas privadas”, detallou o alcalde. A seguridade tamén estará garantida cun despregue das forzas e corpos de seguridade do Estado.

O alcalde aproveitou tamén para facer balance do verán no concello: “Foi o segundo mes de xuño máis exitoso da historia do parque acuático, só superado polo ano 2015”. Todo apunta, sinalou, a que o bo tempo volverá nos vindeiros días, algo que sen dúbida aumentará a afluencia de visitantes, tanto á festa como aos espazos naturais e lúdicos da zona.

A Festa do Cochiño representa a simbiose entre tradición e modernidade, entre festa popular e desenvolvemento local, converténdose nun escaparate para os produtos galegos, a cultura musical e a hospitalidade de Cerceda. Como resumiu o propio alcalde: “É unha festa moi completa, con manifestacións culturais, gastronómicas, musicais e familiares… unha festa que medra cada ano e da que todos nos sentimos orgullosos”.