Padrón presenta a súa estratexia de habitabilidade e crecemento con seis liñas clave de actuación

• O plan baséase en seis liñas clave: regulación turística, nova construción, vivenda pública, licenzas máis áxiles, rehabilitación e novos plans urbanísticos
• “Estamos sentando as bases para elevar a calidade de vida das padronesas e padroneses, e para que toda aquela persoa que queira vivir no noso municipio poida facelo con calidade e dignidade”, subliña Anxo Arca

Padrón. 25-6-2025.- O Concello de Padrón fixo pública este mércores 25 de xuño a súa estratexia de habitabilidade e crecemento, unha folla de ruta clara e ambiciosa que ten como obxectivo resolver o problema estrutural de acceso á vivenda, dinamizar o urbanismo local e fixar poboación a medio e longo prazo.

O alcalde, Anxo Arca, explicou as liñas estratéxicas nas que leva traballando o actual goberno municipal dende hai meses, co convencemento de que «o acceso á vivenda é o principal reto ao que se enfronta Padrón se quere garantir o seu futuro». A estratexia municipal estrutúrase arredor de seis grandes eixes de acción, deseñados para actuar sobre os principais condicionantes urbanísticos, legais e sociais que limitan o crecemento ordenado e sostible do municipio.

1. Regulación das vivendas de uso turístico

O Concello de Padrón está a preparar unha ordenanza específica que adapte a normativa superior á realidade local, seguindo modelos de éxito como o de Santiago de Compostela. Están en estudo medidas como a limitación en altura, a transformación de baixos comerciais en vivendas, a posibilidade de declarar zonas tensionadas e a implantación dunha taxa turística. O obxectivo é  recuperar vivendas para o alugueiro convencional e contribuír á moderación dos prezos.

2. Fomento da construción de vivenda nova

Padrón leva décadas sen desenvolver vivenda nas zonas máis atractivas debido á existencia de unidades de actuación bloqueadas por intereses especulativos. O goberno actual traballa activamente para desbloquear estas unidades e poñer en marcha proxectos urbanísticos reais. O exemplo máis destacado é a unidade da antiga azucreira en Iria, onde xa está moi avanzado un plan de urbanización que se espera poida comezar a executarse en breve. A este respecto, o rexedor criticou con dureza a política urbanística do Partido Popular que “durante máis de vinte anos fixo que Padrón vira como moitos pobos do seu entorno medraron mentres que o noso quedou estancado” e engadiu que “será este goberno quen desbloquee esta situación e sente as bases do crecemento, porque Padrón é un pobo cheo de oportunidades onde moita xente quere vivir”.

3. Vivenda pública: dispoñibilidade de terreos

Dentro da mesma unidade de actuación da azucreira, o Concello prevé poñer a disposición da Xunta de Galicia e do Goberno de España terreos para a construción de vivenda pública. O obxectivo é garantir “o dereito a unha vivenda digna” e facilitar o acceso á mesma a toda a cidadanía.

4. Axilidade na tramitación de licenzas

Dende a chegada do novo goberno, a xestión urbanística mellorou de forma notable, reducindo tempos de tramitación eincrementando o volume de obras en execución. O Concello comprométese a seguir mellorando os procedementos para facilitar que as iniciativas de construción e rehabilitación se poidan desenvolver sen demoras innecesarias Anxo Arca aludiu neste punto á importante cantidade de obras en execución nestes momentos en todo Padrón, que evidencia a axilidade crecente do departamento de urbanismo en canto á resolución de licencias urbanísticas e comunicacións previas.

5. Rehabilitación de vivenda ruinosa urbana e rural

O Concello está a promover a rehabilitación do parque de vivendas en mal estado, tanto no centro urbano como no rural, ofrecendo asesoramento sobre axudas e subvencións dispoñibles e axilizando os trámites urbanísticos correspondentes.

6. Planificación estratéxica: plans especiais e PXOM

Está xa moi avanzado o Plan Especial do casco urbano de Padrón, que se prevé someter a aprobación inicial proximamente. Tamén se traballa activamente no Plan Especial de Iria e na revisión do Plan Xeral de Ordenación Municipal (PXOM), cun ritmo constante de reunións técnicas bisemanais. Estes instrumentos permitirán definir de forma clara os criterios urbanísticos e garantir que todas as actuacións se adapten ás necesidades actuais da cidadanía.

O alcalde Anxo Arca concluíu destacando que “Padrón está preparado para aumentar o seu nivel de habitabilidade. Estamos sentando as bases para elevar a calidade de vida das padronesas e padroneses, e para que toda aquela persoa que queira vivir no noso municipio poida facelo con calidade e dignidade”. Esta estratexia enmarca o labor do goberno municipal nunha visión de futuro que combina o rigor técnico coa vontade política de dar resposta aos grandes retos demográficos e sociais que afectan á vila.