Oroso prepárase para o Festival Psicotroita e anuncia a creación da Casa da Xuventude

Doval comezou a entrevista cunha actualización sobre a próxima edición do Festival Psicotroita, que se celebrará este sábado no Paseo do Carboeiro. Este evento, xa na súa novena edición, consolidouse como unha cita imprescindible para os amantes do pop e o rock, atraendo a máis de mil persoas o ano pasado. Nesta edición, contarán con bandas internacionais de Arxentina e Italia. O alcalde destacou o apoio do promotor do evento, Manuel Tarrío, e da Dirección Xeral de Cultura da Xunta, que fai posible a realización do festival.

No ámbito social, Doval subliñou o éxito das actividades para persoas maiores, que ampliaron a súa oferta este ano para chegar a máis parroquias do concello. Obradoiros de memoria, ximnasia, baile, tai chi e ioga forman parte dun programa dirixido a promover o envellecemento activo en todas as comunidades do municipio. “A participación é moi alta, o que demostra o interese dos nosos maiores por manterse activos e conectados”, comentou.

Ademais, o alcalde destacou que Oroso conta cunha das taxas de poboación xuvenil máis altas da comarca, con máis de 1.200 menores de 18 anos dun total de 8.000 habitantes.

O punto máis destacado da entrevista foi a primicia da creación dunha Casa da Xuventude. O antigo centro de saúde, que actualmente alberga a policía local, será remodelado para converterse nun espazo moderno e multifuncional dedicado á mocidade. A nova Casa da Xuventude ofrecerá un lugar de encontro onde os mozos poderán socializar, ver a televisión, xogar e realizar diversas actividades. “É un espazo diáfano de máis de 120 metros cadrados, deseñado para que os mozos poidan gozar sen preocuparse polos ruídos ou por molestar os veciños”, explicou Doval.

O proxecto tamén inclúe melloras na Escola de Música onde se renovarán as aulas con insonorización para mellorar a calidade da aprendizaxe musical, e modernizaranse as instalacións.

En canto ás infraestruturas, o alcalde sinalou que o concello investirá máis de 600.000 euros no Plan de Obras e Servizos (POS+), enfocándose en renovar o campo de fútbol, incluíndo o cambio de céspede artificial e a instalación dun sistema de cámaras intelixentes para retransmitir os partidos en streaming. “Queremos levar a Oroso ao futuro con instalacións deportivas de vangarda”, afirmou Doval.

Así mesmo, asfaltaranse as principais rúas de Sigüeiro, mellorando a rede viaria nas zonas máis transitadas e perigosas. Entre estas melloras, inclúese unha senda peonil dun quilómetro na parroquia de Santomé, co obxectivo de aumentar a seguridade viaria.

Sobre a recente proposta dunha fusión entre municipios limítrofes con Santiago de Compostela, Doval mostrou cautela, indicando que non estaba contemplado que Oroso participase nese tipo de fusións. Porén, destacou que a colaboración entre municipios a través da Mancomunidade de Ordes, da que Oroso forma parte, foi positiva para os veciños. «Ás veces, discutimos máis dentro do noso partido que co da fronte. Iso demostra que, con boa vontade, as mancomunidades poden ser moi efectivas», comentou.

Doval subliñou que as fusións deben darse entre municipios en igualdade de condicións, para evitar que se convertan en absorcións que perxudiquen a identidade e independencia dos municipios máis pequenos.

Por último, o alcalde enfatizou a importancia do comercio local, recoñecendo os desafíos aos que se enfrontan os comerciantes autónomos no día a día. Coa chegada da campaña de Nadal, o concello xa está traballando en iniciativas para apoiar aos comerciantes, buscando sempre escoitar as súas necesidades para garantir que as campañas sexan eficaces.

Con todos estes proxectos en marcha, o alcalde Álex Doval deixa claro o seu compromiso co desenvolvemento de Oroso, desde as infraestruturas ata o benestar social, poñendo sempre aos veciños no centro da súa xestión.

A entrevista completa no seguinte enlace.