O PSdeG inaugura a súa nova sede en Oroso
O secretario xeral do PSdeG, José Ramón Gómez Besteiro, participou na inauguración da nova sede da Agrupación Socialista de Oroso, un acto no que fixo un chamamento á militancia para reforzar o proxecto político local e afrontar con forza os retos electorais dos vindeiros anos.
Líder Redacción
30 de mayo de 2026 a las 23:55
A cita, celebrada en Sigüeiro, reuniu a representantes institucionais, cargos orgánicos e afiliados socialistas. Durante a súa intervención, Besteiro subliñou a importancia de manter unha organización activa e próxima á veciñanza para consolidar unha alternativa capaz de recuperar a Alcaldía do municipio.
O líder socialista puxo en valor a etapa na que o PSdeG estivo á fronte do Concello durante máis de dúas décadas, un período que, segundo destacou, contribuíu á transformación de Oroso mediante a mellora dos servizos públicos, das infraestruturas e dos equipamentos municipais.
Neste contexto, defendeu a necesidade de fortalecer os vínculos coa cidadanía e de elaborar propostas que dean resposta ás demandas e necesidades actuais da veciñanza. «É fundamental escoitar, dialogar e traballar desde a proximidade para construír un proxecto útil para Oroso», sinalou.
A nova sede da agrupación socialista pretende converterse nun espazo aberto á participación, ao debate e á actividade política, favorecendo un contacto máis directo cos veciños e veciñas do municipio. Desde o partido consideran que estas instalacións servirán para impulsar novas iniciativas e fortalecer a presenza socialista na localidade.
Besteiro mostrouse convencido de que o PSdeG conta coa capacidade e o equipo necesarios para recuperar a confianza do electorado e volver liderar o goberno municipal no futuro
