O novo colexio do Milladoiro sae a licitación por 12 millóns de euros

O centro, que acollerá a 450 alumnos e permitirá atender as necesidades educativas dunha poboación en aumento, será o primeiro colexio construído en base ás pautas establecidas no Plan de Nova Arquitectura Pedagóxica que deseña espazos educativos máis abertos, flexibles, sustentables, intelixentes e integrados na contorna

Ames, 1 de abril de 2025.- A Xunta de Galicia vén de aprobar este luns, 31 de marzo, o prego de cláusulas administrativas, o expediente de contratación, o gasto e a apertura do procedemento de adxudicación para a construción do novo centro de educación infantil e primaria no Milladoiro. O expediente de contratación publicouse hoxe no portal de Contratos Públicos de Galicia. O centro, que acollerá a 450 alumnos e permitirá atender as necesidades educativas dunha poboación en aumento, será o primeiro colexio construído en base ás pautas establecidas no Plan de Nova Arquitectura Pedagóxica que deseña espazos educativos máis abertos, flexibles, sustentables, intelixentes e integrados na contorna.

O 17 de xaneiro de 2024 asinouse o acordo de colaboración entre a Consellería de Educación e a Axencia Galega de Infraestruturas, para a realización das actuacións precisas para a construción dun centro educativo no Milladoiro. Posteriormente, tralas correspondentes xestións administrativas o pasado 13 de decembro de 2024 declarouse deserta a licitación do expediente de contratación de dito proxecto, o que fixo necesario a actualización de prezos do proxecto básico e de execución.

O pasado 4 de marzo de 2025 acordouse o inicio do segundo expediente de contratación. Deste xeito, este luns 31 de marzo de 2025, aprobouse o correspondente prego de cláusulas administrativas particulares, o expediente de contratación, o gasto e a apertura do procedemento de adxudicación. O orzamento base de licitación de dito proxecto ascende a 12.129.976,78 euros (IVE incluído). O período para presentar ofertas estará aberto ata o 2 de maio de 2025.

O alcalde, Blas García, agarda que o expediente de contratación estea resolto o antes posible para que as obras de construción poidan comezar antes de rematar este ano. “Esta é unha das actuacións consideradas estratéxicas para o Concello de Ames no que respecta ao futuro do núcleo máis grande e importante do municipio, xunto coa humanización da nacional N-550, que se está executando na actualidade, o remate do Centro multifuncional e o Complexo deportivo do Milladoiro”.

Plan de Nova Arquitectura Pedagóxica

O colexio, o primeiro que será construído de xeito íntegro baixo os parámetros do Plan de Nova Arquitectura Pedagóxica, será totalmente accesible e contará con espazos multidisciplinares, flexibles e adaptados ao ensino do século XXI. Cunha superficie construída de 4.886 metros cadrados distribuída en dous andares, estará dotado de 6 aulas de infantil e 12 de primaria, cos aseos correspondentes, así como outras catro de apoio educativo e desdobramento de grupos, aula de música e sala de usos múltiples.

A biblioteca terá acceso directo desde o vestíbulo e desde o exterior e o ximnasio terá dúas alturas, gradas e vestiarios. Tamén estará dotado con área de administración (con despachos, conserxería, local para a ANPA, etc) comedor e zonas de servizos comúns.

De acordo co establecido no Plan de Nova Arquitectura Pedagóxica, o centro estará dotado dun foro multifuncional que servirá como espazo de aprendizaxe aberto. Situarase no espazo central do primeiro andar, entre as aulas de primaria e as de desdobre, creando unha relación entre as diferentes estancias e conectándose co patio mediante unha gran fiestra protexida da incidencia do sol.

Ademais, o novo colexio terá un espazo específico para Polo Creativo, no que o alumnado poderá traballar as competencias STEM, a través de proxectos de robótica ou intelixencia artificial, equipado cos materiais necesarios. No que atinxe aos espazos exteriores, estará dotado de zona cuberta e descuberta exterior para as aulas de infantil e de pista polideportiva cuberta e descuberta.

Totalmente accesible

A accesibilidade do edificio plantéxase desde un punto de vista universal e inclusivo, evitando calquera tipo de barreira, con accesos directos tanto desde o interior como desde o exterior do edificio a boa parte das estancias. Deste xeito, o proxecto propón itinerarios de circulación intuitivos e libres de obstáculos, en prol dunha orientación más sinxela, e espazos de comunicación ben iluminados con luz natural. Isto completarase coa colocación de sinais de gran tamaño e cor facilmente visibles.

Ademais, tanto no exterior do edificio como nos espazos interiores haberá superficies podotáctiles que guíen ao acceso, vestíbulo e outros puntos de importancia do edificio. Os diferentes espazos exteriores serán tamén accesibles mediante ramplas.