O futuro do Abellá feminino en mans da Federación
Redacción, 12 de setembro de 2024.- O equipo feminino do Abellá afronta unha situación crítica tras recibir, sen previo aviso, o calendario da segunda división galega por parte da Federación. A sorpresa chegou cando o equipo foi incluído no grupo 2, composto maioritariamente por equipos de Ourense e Vigo, o que implicaría desprazamentos de ata 4000 km ao longo da tempada, moi superiores aos 1000 km que farían o resto de equipos da mesma categoría.
Líder Redacción
12 de septiembre de 2024 a las 14:37
O Abellá, que ata agora competía no grupo 1 contra equipos próximos como a U.D. Carral, coa que compartían apenas 20 minutos de desprazamento, considera esta decisión inxusta e insostible. O equipo, formado no rural e con máis de 10 anos de traxectoria xogando contra equipos da mesma contorna, rexeita verse forzado a enfrontarse a desprazamentos de longa distancia que dificultarían a súa participación na competición.
O club xa presentou diversas reclamacións, sen éxito nin resposta. Hoxe, ás 20:00 horas, terá lugar unha reunión coa Federación onde o Abellá Feminino defenderá a súa petición de ser incluído de novo no grupo 1. O equipo advirte que, de non haber cambios, podería verse obrigado a abandonar a competición, poñendo en risco a continuidade do proxecto deportivo.
A situación subliña as inxustizas que seguen a afectar ao fútbol feminino, en particular aos equipos máis pequenos e humildes. «Por que nós? É máis importante o fútbol da capital que o noso? Somos un equipo do rural e esiximos igualdade», manifesta o club, que hoxe loitará por un cambio xusto que lles permita seguir competindo nas mesmas condicións que os demais.
«Queremos igualdade para todos!», reivindican, mentres se preparan para defender o seu dereito a competir en igualdade de condicións.
