Mónica González, edil de Cultura da Baña: «Este ano queremos chegar ás 10.000 filloas»

• A festa celébrase este domingo 16 de febreiro e busca a declaración de Interese Turístico de Galicia

A Baña quenta motores para celebrar este domingo 16 de febreiro a súa tradicional Festa da Filloa da Pedra, unha xornada que fusiona gastronomía, cultura e tradición. Nesta 21ª edición, espérase superar as 10.000 filloas elaboradas en directo sobre as 30 pedras que estarán en funcionamento. Ademais, a festa contará cunha completa programación que inclúe música, unha ruta ciclista e obradoiros para os máis pequenos.

En declaracións a Radio Líder Santiago, a concelleira Mónica González destacou que «todo está listo para recibir a milleiros de persoas que poderán gozar das nosas filloas, preparadas coa receita tradicional e feitas sobre pedra, como marca a tradición».

Programación variada e música en directo

O evento dará comezo ás 9:30 horas coa apertura das portas do pavillón de San Vicenzo. Ás 10:00 horas, terá lugar a Ruta Ciclista da Filloa, unha actividade non competitiva pensada para desfrutar en familia. Ás 12:00 horas, a música tradicional cobrará protagonismo coa actuación da Escola de Música Tradicional da Baña, que inclúe gaiteiros, pandereteiras e un coro.

O pregón deste ano correrá a cargo do músico e mestre Alonso Caxade, quen ás 13:00 horas ofrecerá un discurso especial. «É un orgullo poder contar cun pregoeiro tan vencellado á nosa cultura e tamén á nosa comunidade», sinalou González durante a entrevista.

A sesión vermú comezará ás 13:30 horas co Trío Alborada, seguido polas actuacións de Sete Ferrados e Os Carunchos. Como colofón, ás 19:30 horas, o concerto de Fillas de Cassandra porá o broche de ouro á xornada.

Filloeiros en acción e novidades gastronómicas

Segundo os datos da organización, o ano pasado elaboráronse entre 5.000 e 6.000 filloas, pero este ano a previsión é superar as 10.000 unidades. «Gústame ser optimista, e creo que este ano acadaremos esa cifra», afirmou a concelleira.

Ademais das filloas, tamén se ofrecerán outros produtos típicos como orella de porco, chourizo e viño. Tamén haberá un polbeiro que engadirá un toque especial á oferta gastronómica.

Unha das novidades deste ano será a presenza do cociñeiro José Manuel Mayón, que colaborará cunha degustación especial grazas a Tenreira Galega. «Este ano non estará como filloeiro, pero si se encargará de preparar uns petiscos especiais para os asistentes á ruta ciclista e ao público en xeral», explicou González.

Un paso cara á declaración de Interese Turístico de Galicia

Durante a festa tamén se levará a cabo unha recollida de sinaturas para apoiar a candidatura da Festa da Filloa da Pedra da Baña como Festa de Interese Turístico de Galicia. «Non é un requisito obrigatorio, pero queremos demostrar o apoio popular e o valor que ten esta celebración para a nosa cultura», sinalou a concelleira.

O Concello da Baña xa iniciou o proceso administrativo para lograr esta distinción, que recoñecería oficialmente a singularidade e relevancia da festa. «Organizar un evento deste nivel nun concello pequeno coma o noso é un reto, pero ver o apoio da xente dálle sentido a todo o esforzo», concluíu a edil.

Con esta mestura de tradición, gastronomía e cultura, a Festa da Filloa da Pedra da Baña volve consolidarse como unha cita imprescindible no calendario festivo galego.

A entrevista completa, no seguinte enlace