O artista galego Filloas visitou recentemente os estudios de Radio Líder Santiago para presentar o seu novo traballo ‘Súbete ao EVA’ e falar sobre a súa traxectoria, a súa evolución musical e o momento actual da música en galego. «Este proxecto ten que ser en galego porque é moi persoal», asegurou.
Líder Redacción
19 de febrero de 2025 a las 16:15
Filloas, cuxo nome real é Iago, explicaba na entrevista que a súa carreira musical comezou no punk, pero que nos últimos anos evolucionou cara a estilos máis urbanos. «Pasei do punk a Bad Bunny sen darme conta», confesou entre risas. A pandemia foi clave nesta transformación, xa que durante ese tempo de inactividade comezou a escoitar artistas como Duki e Boyanka Kostova e a experimentar con novos sons.
O resultado desta viaxe musical cristalizou no hyperpop, un xénero que define como «a versión moderna do punk». «O hyperpop é máis acelerado, con moitos efectos e sobrecargado, igual que o punk. Sinto que hai unha conexión moi natural entre ambos estilos», explicaba.
Un dos aspectos máis destacados da súa proposta é que aposta pola música en galego. «O galego mola. Eu nací nunha familia castelanfalante, pero o galego foi a lingua do Xabarín Club, de Shin chan, do Detective Conan… e iso marcoume», contou. Para el, a lingua non é un obstáculo senón unha ferramenta que lle permite conectar co seu público de maneira auténtica.
Filloas destaca ademais o bo momento que vive a música en galego. «Hoxe en día, os festivais contan con moitos artistas galegos e hai grupos que enchen salas en Madrid. Nunca houbo tanto público para a nosa música», asegurou.
O artista está inmerso nunha xira de concertos onde defende o seu novo traballo con moita enerxía sobre o escenario. «A nosa música é super de festa, moi rápida, e en directo creamos unha conexión brutal co público», explicou.
Non está só no escenario, xa que conta coa compañeira Paula Ferraz, que se encarga de guitarras, síntese e bases. «Ela é unha máquina. Ademais de tocar, ten un carisma enorme, e nos momentos nos que eu me calo, ela mantén ao público arriba», destacou.
As letras de Filloas combinan retranca, referencias á cultura friki e reflexións profundas. Un exemplo é o seu tema «22 Minutos», a primeira canción de amor que compuxo. «Escoitando a letra, parece que falo de videoxogos e anime, pero o amor está de fondo», explicaba.
Outro dos seus temas destacados é «A morte vai comigo», onde reflicte sobre a súa ansiedade coa idea da morte. «Sempre tiven moito medo á morte, e esta canción é unha forma de poñer en palabras ese sentimento», confesou.
A pesar do crecemento do proxecto, Filloas non ten claro se quere dedicarse exclusivamente á música. «Prefiro combinar a música coa miña outra paixón, a informática. Para min é importante ter unha estabilidade mental e non vivir coa ansiedade do que pode pasar no mundo da música», admitiu.
Con todo, a súa paixón pola música segue intacta e vé o proxecto con percorrido. «Non sei como soará Filloas dentro de 25 anos, pero si sei que manterá a mesma actitude», afirmou.
Filloas segue coa súa xira de concertos e está a preparar a súa presenza en festivais para este verán, consolidando o seu posto como un dos artistas máis interesantes da música urbana galega.
A entrevista completa no seguinte enlace.
Recibe las noticias en tu correo.
