Verea: «O muro de Bonaval leva dous meses sendo a imaxe máis clara da xestión de Goretti Sanmartín»

Verea advertiu de que “cando pasan dous meses sen dar resposta a un problema nun dos lugares máis emblemáticos da cidade, o que se evidencia é unha desconexión total coa cidade”. “Bonaval non é un parque máis, é un símbolo de Santiago, un espazo que forma parte da identidade da cidade, da vida diaria dos santiagueses, do que somos”, engadiu.

O popular apelou ao sentimento de cidade ao sinalar que “se es de Santiago, Bonaval non é só un parque, sabes perfectamente o que significa: ese pequeno milagre, sen estridencias, sen ruído, e coas torres da Catedral asomando por riba dos tellados”. Neste sentido, incidiu en que “para un santiagués, Bonaval non precisa explicación, e se algo define a unha cidade é como coida o que é seu”.

“Non ten explicación que dous meses despois do derrubamento do muro, a imaxe que se proxecta sexa a da inacción, a desidia e a falta de resposta”, criticou, ao tempo que lembrou que “pasaron semanas nas que a cidadanía segue vendo o mesmo: un muro caído, unha zona degradada e un goberno que non foi quen de dar unha resposta á altura”.

“Nin urxencia, nin planificación, nin capacidade de reacción. Isto vai moito máis alá dunha obra concreta”, advertiu Verea, quen insistiu en que “isto fala dunha maneira de gobernar, dun modelo no que as prioridades non están claras, no que o importante queda relegado e no que se perde o pulso real da cidade”.

O líder popular foi claro ao afirmar que “dous meses foi tempo suficiente para declarar a emerxencia e reconstruír e rehabilitar o muro, moito máis tratándose dun ben patrimonial protexido BIC”. “Estamos a falar dun elemento que é patrimonio 100% do Concello, con responsabilidade e titularidade 100% do Concello”, subliñou.

“Non será que, como sempre, están esperando a que outros lles resolvan o problema? Estarán esperando a que o arranxe a Xunta de Galicia?”, preguntouse, para concluír que “o problema xa non é o muro, é unha cuestión política directamente ligada á maneira de gobernar de Goretti Sanmartín”.

Neste sentido, criticou “esa indolencia, esa desidia, e esa tendencia a botarlle a culpa a outros, habitualmente ao Partido Popular, cando o problema xa non se pode ocultar”.

Verea reclamou explicacións á alcaldesa: “Debe explicar por que Bonaval non foi unha prioridade desde o minuto un, por que un dos espazos máis queridos de Santiago leva dous meses sen solución”. “Querer unha cidade non é dicilo nos discursos, é demostralo con feitos: actuar rápido cando algo falla, coidar o patrimonio e entender que hai lugares que forman parte da alma colectiva e que non poden quedar esquecidos durante semanas”, engadiu.

O popular insistiu en que “dous meses é tempo suficiente para declarar a emerxencia, reconstruír e rehabilitar, é o que eu faría como alcalde”, e reiterou que “a responsabilidade deste muro é 100% do Concello, non pertence a ningunha outra administración: a propiedade é do Concello e a solución ten que vir da alcaldesa e do seu equipo de goberno”.

COMPARATIVA CON LUGO

Durante a súa intervención, Verea puxo un exemplo “moi gráfico” que, ao seu xuízo, evidencia a diferenza na xestión: “na mesma época na que caeu o muro de Bonaval, caeu tamén un tramo da muralla de Lugo”.

“Dous ou tres días antes caeu a muralla de Lugo, e hoxe está perfectamente reconstruída e rehabilitada. Ás 48 horas xa había técnicos traballando”, explicou.

“Por que en Lugo se pode comezar a actuar en días e en Santiago, despois de dous meses, non sabemos absolutamente nada do muro de Bonaval?”, preguntouse, ao tempo que cuestionou: “declararon a emerxencia? teñen tan sequera un proxecto? sabemos canto pode custar rehabilitar o muro?”.

Verea lembrou que “a Muralla de Lugo é responsabilidade e propiedade 100% da Xunta de Galicia, mentres que o muro de Bonaval é propiedade e responsabilidade 100% do Concello de Santiago”, e concluíu que “se se pode facer en Lugo ante unha situación semellante, moito máis debería poder facerse aquí”.

TURISMO E OCUPACIÓN HOTELEIRA

O líder popular enmarcou esta situación nun contexto máis amplo de “datos alarmantes” no ámbito turístico. “Desde o verán pasado, desde mediados de xuño, hai unha caída na ocupación hoteleira en Santiago, con meses nos que chega ao 8% e ao 10% anual, mentres outras cidades medran, nomeadamente A Coruña”, indicou.

“A pregunta é clara: por que A Coruña medra en ocupación hoteleira sen ter unha industria turística como a nosa, sen ser un referente como Santiago? Eles medran e nós caemos”, afirmou.

Verea lembrou que “Ryanair marchou en novembro, pero a caída vén de meses antes”, polo que considera que “hai responsables claros”.

“Ninguén pode negar que desde o minuto un, o goberno de Goretti Sanmartín, de BNG e CA, puxo o foco negativo sobre os visitantes, falando de turismo excesivo, de que o turismo molestaba ou de que había demasiada xente”, sinalou.

Neste sentido, criticou que “se creou un relato irresponsable no que o turismo era visto como algo negativo, algo que había que controlar ou incluso educar”, e puxo como exemplo “medidas como poñer persoas no casco histórico cun sonómetro para medir o ruído dos turistas”.

“Iso retrata perfectamente a irresponsabilidade dun goberno que non cría no turismo”, asegurou.

Finalmente, concluíu que “supostamente estarán encantados, porque iso era o que querían: menos turistas, menos visitantes e unha cidade cada vez máis pechada”, e engadiu que “estarán aplaudindo nos seus despachos esta desfeita da que son protagonistas”.