O líder do Partido Popular en Santiago, Borja Verea, advertiu hoxe no pleno municipal de que existen “datos oficiais que non son discutibles” que evidencian un incremento da criminalidade na cidade.
Líder Redacción
1 de mayo de 2026 a las 01:24
“O ano pasado, con datos anuais xa pechados, 2025 rexistrouse o máximo histórico da cidade. Nunca tantos delitos houbo como o ano pasado. 2025 foi o ano con maior número de delitos en Santiago desde que hai rexistros”, afirmou.
Verea sinalou que se trata dunha “tendencia que se vai incrementando ano a ano” e dunha “tendencia á alza na criminalidade na nosa cidade”.
O dirixente popular puxo o foco tamén en determinados delitos, destacando que “os delitos de lesións e as liortas tumultuarias aumentaron un 41%”, o que cualificou como “case o dobre que antes da pandemia de 2019”, incluíndo neste tipo delituoso “moitos episodios de pelexas e altercados que se producen en zonas de ocio nocturno”.
Así mesmo, indicou que “outro incremento significativo é o dos roubos con violencia, que aumentaron un 72%”.
“Polo tanto, en 2025 —dato non discutible— foi o ano con maior criminalidade na nosa cidade. E tamén o ano pasado Santiago foi a cidade galega con maior taxa de criminalidade por habitante”, afirmou, engadindo que son “datos que están á vista de todo o mundo”.
Neste sentido, asegurou que esta realidade “é percibida tamén polos santiagueses e polas santiaguesas”, facendo referencia a problemas como “narcopisos, problemas de convivencia, problemas de seguridade, ruído, altercados nocturnos, roubos na rúa e nos establecementos”.
Verea dirixiuse directamente á alcaldesa para preguntarlle se coñece esta situación: “Supoñemos, señora Sanmartín, que vostede coñece estes datos, coñece esta realidade”.
Tamén enumerou distintos barrios onde, segundo indicou, se producen estes problemas: Ensanche, Vista Alegre, Conxo, Vite, Fontiñas, Casco Histórico, Santa Marta, Almáciga, Laraño e San Pedro.
O líder popular recoñeceu que a seguridade é unha responsabilidade compartida entre o Concello e o Ministerio, pero sinalou que a súa proposta se centra nas competencias municipais.
“Que pode facer o Concello dentro das súas competencias? Que lle propoñemos á alcaldesa?”, preguntou, lembrando que este é un debate que xa trouxeron en varias ocasións pero que agora queren concretar “nunha medida clara, medible e cuantificable”.
“Estamos a falar das cámaras de videovixilancia. Propoñemos instalar máis cámaras de videovixilancia, incrementar o parque de cámaras da cidade e dotalas dos medios necesarios para que poidan gravar imaxes útiles para a prevención, a investigación e o esclarecemento de delitos”, explicou.
Segundo indicou, trátase dunha medida que depende dunha decisión política do Goberno de BNG e CA.
Verea criticou que habitualmente os nacionalistas rexeiten esta proposta alegando cuestións de intimidade, algo que non comparte: “Entendemos que iso non é así, que si son útiles e necesarias”.
Neste sentido, lembrou que “a propia Policía Nacional trasladou hai uns días a necesidade de instalar máis cámaras e de que estas graven imaxes”, e que “en moitas outras cidades está demostrado que alí onde se instalan, redúcese a delincuencia”.
O líder popular asegurou que agarda coñecer o posicionamento do Goberno do BNG e de CA sobre esta proposta.
COMISARÍA Á INTEMPERIE
Durante a súa intervención, Verea tamén criticou a actuación do executivo local ante a situación da Policía Nacional tras o incendio da comisaría.
“Señora Sanmartín: o seu goberno di que lle preocupa e que comparte a preocupación polo incremento da inseguridade, pero a realidade di todo o contrario”, afirmou.
Neste sentido, puxo como exemplo a situación na Praza do Obradoiro, onde se instalou un servizo provisional: “Temos o mellor exemplo aquí, na Praza do Obradoiro: un campamento á intemperie con dúas furgonetas que vostede ve todos os días cando entra en Raxoi”.
Verea referiuse ás colas de veciños e veciñas: “Sabe cantas persoas fixeron cola á intemperie? Máis de 8.000. Día tras día. Con chuvia e sen chuvia”.
Así mesmo, preguntou directamente á alcaldesa: “Fixo vostede algo? Fixo vostede algo?”.
O dirixente popular criticou tamén que non se atendese aos representantes dos traballadores da Policía Nacional: “Porque nin sequera recibiron aos representantes dos traballadores. Non é que non os recibisen. É que nin sequera responderon á súa solicitude de reunión”.
Ademais, subliñou que esta falta de resposta se produciu malia que o Goberno de BNG e CA coñecía perfectamente a situación: “Vostedes víanos entrar e saír de Raxoi todos os días, a poucos metros, e non tiveron nin a mínima educación de responder”.
Neste contexto, preguntou: “Por que non recibiu vostede a uns traballadores que lles estaba pedindo amparo? Por que non lles responderon?”.
“Esa é a preocupación que teñen pola seguridade?”, cuestionou.
Verea agradeceu ao concelleiro de CA que recoñeza que “os datos non son bos e que está preocupado”, aínda que botou en falta “un debate máis amplo sobre as cámaras de videovixilancia”.
“É un debate lexítimo. Nós estamos a favor, vostedes están en contra. Pero por que?”, afirmou.
O líder popular concluíu defendendo que estas medidas son útiles e non afectan á intimidade: “Axudan a previr delitos e tamén a investigalos, e as imaxes só poden ser consultadas con autorización xudicial”.
Finalmente, lamentou que este debate non se producise no pleno: “Gustaríanos que este debate puidese terse producido nesta sesión plenaria”.
Recibe las noticias en tu correo.
