Vedra aposta pola conciliación e a creación dun centro de día para maiores

• «O rural precisa máis apoio para seguir sendo atractivo e sostible», afirma o alcalde Carlos Martínez.
• «Vedra é como se colleras unha man chea de casas e as tiraras ao aire», comentou, referíndose á distribución irregular das vivendas xa que «non temos un núcleo urbano».
• «A burocracia está a afogar as comisións de festas e o asociacionismo», alerta o rexedor.

Carlos Martínez, alcalde de Vedra, protagonizou unha entrevista en Radio Líder Santiago na que repasou os principais retos e proxectos aos que se enfronta o seu concello. A charla, que durou máis de vinte minutos, permitiu afondar en cuestións fundamentais para o futuro deste municipio eminentemente rural, como a ampliación da rede de abastecemento de auga, os servizos de conciliación ou a crise do asociacionismo debido á excesiva burocracia.

Os pequenos problemas dos veciños, unha prioridade

Martínez comezou a entrevista facendo fincapé na importancia de atender as pequenas problemáticas dos veciños, como alcantarillas atascadas ou baches nas estradas. «Ás veces preocúpanos máis os grandes proxectos, pero o veciño do día a día preocúpalle se a súa estrada está en bo estado ou se a súa casa se encharca cando chove», explicou o alcalde. Para el, estas cuestións son prioritarias, sobre todo nun concello como Vedra, onde a pluviosidade é alta e a dispersión xeográfica complica as solucións.

Ampliación da rede de abastecemento: un proxecto clave

Un dos temas centrais da entrevista foi a ampliación da rede de abastecemento de auga, un proxecto que, segundo Martínez, «é esencial para garantir a calidade de vida no rural». A rede actual abarca máis de 40 quilómetros, pero o obxectivo do goberno local é que chegue a todas as parroquias antes de que remate a lexislatura. Aínda que recoñece que levar a auga a todas as vivendas é un reto complexo, asegura que traballarán para que este servizo chegue ao maior número posible de fogares. «A xente dáse conta de que, sen auga, non hai calidade de vida», apuntou.

A dispersión rural, un desafío na prestación de servizos

Vedra é un concello altamente disperso, sen núcleo urbano definido, algo que, segundo o alcalde, complica a prestación de servizos básicos. «Vedra é como se colleras unha man chea de casas e as tiraras ao aire», comentou, referíndose á distribución irregular das vivendas. A pesar de que esta realidade fai máis difícil tarefas como a instalación de redes de abastecemento ou a recollida de lixo, tamén mantén o encanto rural que atrae cada vez máis xente que busca un entorno tranquilo e próximo a Santiago de Compostela.

Conciliación e atención á poboación maior

Outro dos puntos destacados da entrevista foi a importancia de apostar pola conciliación familiar. O alcalde subliñou que Vedra xa ofrece servizos como madrugadores e ludotecas, ademais de estar case totalmente cuberto por fibra óptica. Non obstante, recoñeceu que queda traballo por facer no coidado da poboación maior, sobre todo no referente ao apoio ás persoas que coidan familiares con enfermidades como o Alzheimer. Neste sentido, anunciou que se traballa na creación dun centro de día na parroquia de Sanfins, a través da rehabilitación da Casa das Artes. «É unha prioridade e algo urxente para mellorar a conciliación tamén entre as familias con persoas maiores dependentes», afirmou.

A remodelación do centro de saúde e melloras nos colexios

Carlos Martínez tamén falou das obras de remodelación do centro de saúde local, un proxecto que, segundo o alcalde, está a piques de iniciarse e contará cun investimento de entre 500.000 e 600.000 euros. A remodelación será extensa, aínda que a ampliación quedará para unha fase posterior. En canto ás infraestruturas educativas, destacou que o colexio CEO Ortiguera tamén experimentará melloras importantes, incluíndo a creación dun patio exterior cuberto e a ampliación do comedor.

A burocracia e a crise do voluntariado

Un dos puntos máis críticos da entrevista foi a denuncia que fixo Martínez sobre a burocracia que está a «afogar» ás comisións de festas e ao asociacionismo en xeral. «É excesiva, pedimos o mesmo a unha comisión que organiza unha festa cun orzamento de mil euros que a unha que manexa trinta mil», lamentou. O alcalde advertiu que esta situación, combinada coa falta de voluntariado, pode levar a que moitas das festas populares desaparezan. «Estamos nun momento crítico, con menos voluntarios e máis papeleo. Iso pode provocar que moitas comisións se boten a un lado», advertiu.

Colaboración entre municipios: Vedra e Boqueixón, un exemplo a seguir

A entrevista tamén deixou espazo para destacar a colaboración entre Vedra e o concello veciño de Boqueixón. Segundo Martínez, ambos municipios comparten servizos como escolas deportivas, proxectos culturais e incluso a subministración de auga, o que mellora a eficiencia na xestión e beneficia a veciñanza. «Colaboramos en todo o que podemos, mantendo a nosa identidade, e iso fai que poidamos ofrecer mellores servizos», explicou.

Pasabodeghas: ruta festiva con viño, música e tradicións na Ulla

O alcalde lembrou na recta final da entrevista a nova edición do Pasabodeghas, unha das festas máis agardadas do outono na comarca compostelá. Este evento, que terá lugar os días 26 e 27 de outubro na parroquia de San Miguel de Sarandón, forma parte do Espazo Activo da Ulla. O Pasabodeghas é unha ruta gaiteira que percorre nove casas-bodega, onde se poderá degustar viño e tapas por un prezo de 15 euros. Ademais da música tradicional, haberá espectáculos de circo e teatro de sombras, exposicións, e concertos nocturnos con bandas de folk, ska e rock.

O domingo pecharase a celebración cunha foliada e sesión vermú a partir das 12:30 horas, con actuacións musicais e obradoiros para toda a familia. O evento, orgamizado pola Asociación Cultural San Campio, tamén contará cun espazo de xogos populares, postos de artesanía e a participación de entidades educativas no proxecto «O río das letras», que busca promover a cultura e as tradicións locais.

A entrevista completa no seguinte enlace.