O Concello de Val do Dubra vén de trasladar formalmente á Consellería de Sanidade a súa preocupación e malestar pola supresión do servizo asistencial os sábados pola mañá no centro de saúde do municipio, unha medida que entrou en vigor neste mes de abril.
Líder Redacción
16 de abril de 2026 a las 22:11
Nun comunicado oficial, o alcalde, en nome do Goberno municipal, subliña que esta decisión supón “un novo retroceso” na prestación dos servizos sanitarios no rural, incidindo nun sistema que xa presenta importantes tensións e listas de espera en aumento. Segundo indican, a eliminación desta atención obrigará a moitos veciños e veciñas a desprazarse ata Santiago de Compostela para seren atendidos nos puntos de atención continuada (PAC), co conseguinte prexuízo.
Ademais, desde o Concello alertan da situación da atención pediátrica, cualificada de “practicamente inexistente” durante boa parte das semanas. A praza, actualmente a tempo parcial, non garante unha cobertura estable, o que obriga ás familias a buscar asistencia noutros centros, principalmente en Santiago, xerando desigualdades no acceso á sanidade.
O Goberno municipal tamén puxo o foco no estado das instalacións do centro de saúde, que consideran necesitadas de investimentos urxentes en mantemento e modernización. Defenden que é imprescindible garantir condicións dignas tanto para o persoal sanitario como para a cidadanía usuaria.
Por todo isto, o Concello solicita á Consellería que reconsidere as medidas adoptadas e que actúe para recuperar a atención sanitaria dos sábados, asegurar unha cobertura pediátrica efectiva e dotar dos recursos necesarios para mellorar as infraestruturas sanitarias locais.
Desde o executivo local agardan que estas demandas sexan atendidas “coa sensibilidade que require a defensa da sanidade pública e dos dereitos da cidadanía do rural”.
Recibe las noticias en tu correo.
