UCIN Santiago de Compostela considera “gravísimo e sen precedentes” que, segundo diversas fontes, onte domingo non houbera persoal operativo no Parque de Bombeiros da capital galega, deixando completamente desprotexida a cidade ante calquera emerxencia.
Líder Redacción
27 de octubre de 2025 a las 11:28
A formación lembra que Santiago é unha cidade con milleiros de residentes, peregrinos e turistas, ademais dun patrimonio histórico e hospitalario de enorme valor, polo que “non pode quedar nin un só minuto sen bombeiros en activo”.
Desde UCIN Santiago esixen explicacións inmediatas á alcaldesa Goretti Sanmartín (BNG) e a dimisión do concelleiro de Seguridade Cidadá, Xan Duro (Compostela Aberta), por unha “xestión absolutamente irresponsable que pon en risco vidas humanas e bens públicos”.
Entre as súas demandas inclúense a comparecencia urxente da alcaldesa para explicar o sucedido, un informe oficial de servizo que detalle os motivos da falta de persoal e a revisión integral da xestión do parque de bombeiros cun plan de reforzo inmediato de quendas e efectivos.
“O que pasou hoxe é intolerable. Santiago non pode quedar sen bombeiros nin por un só turno. Isto é consecuencia dunha xestión política nefasta e dun abandono total do servizo público. O señor Xan Duro debe asumir responsabilidades e dimitir de inmediato”, declarou Diego Adrián Mallo Cao, coordinador local de UCIN Santiago.
A formación lembra ademais que o corpo de bombeiros leva meses advertindo sobre a falta de persoal, o impago de horas extra e a precarización das quendas, unha situación que agora “estala nunha crise de seguridade sen precedentes”.
Recibe las noticias en tu correo.
