UCIN presentará candidatura á alcaldía de Santiago: «Se somos chave, falaremos con todas as forzas»
Adrián Mallo, coordinador de UCIN en Santiago, avanza que será o candidato á alcaldía e aposta por «romper co modelo de profesionalización da política». A formación presume dunha liña aberta ao diálogo e prioriza cuestións como o mantemento urbano, o transporte público ou a saúde mental.
Líder Redacción
12 de junio de 2025 a las 16:57
O partido Unión de Ciudadanos Independientes (UCIN), unha forza municipalista con presenza en diversos concellos do Estado e oito concelleiros en Galicia, dá un paso adiante na capital galega. Así o anunciou o seu coordinador en Compostela, Adrián Mallo, nunha entrevista na emisora Radio Líder Santiago. A súa candidatura busca sumar para as eleccións municipais de 2027 cunha mensaxe centrada en escoitar os problemas da veciñanza e poñer solucións enriba da mesa.
“Temos dous anos moi duros por diante, pero imos traballar para entrar no Pazo de Raxoi”, afirmou Mallo, quen tamén reivindicou que UCIN é unha formación “sen etiquetas ideolóxicas fixas” e que “non veta a ninguén, pero esixe compromisos firmes con Santiago”. A súa vontade de pacto abarca a todas as forzas: “Da igual que sexa nacionalismo, esquerda ou dereita, se cumpren os nosos mínimos haberá apoio. Se somos chave, falaremos con todas as forzas».
Entre as prioridades da formación destacan o mantemento da cidade —“Santiago está sucio, sen iluminación e con parques abandonados”—, a problemática do transporte urbano e a creación dun centro municipal de saúde mental para reducir as listas de espera. Tamén denunciaron a “falta de transparencia” arredor do novo centro de inserción social en Belvís.
Adrián Mallo, compostelán de 33 anos, con experiencia no sector dos coidados e o comercio, defende un modelo de política participativa e temporal: “Non se pode vivir toda a vida da política. Isto é un paso, non un modo de vida”.
En canto ao panorama político actual, considera que o goberno do BNG e CA na capital galega merece un “aprobado”, pero critica que “o contrato do transporte público segue sen resolverse, os buses rompen e hai moitos déficits que xa veñen de antes”.
A formación anuncia que está en proceso de conformar un equipo local e abrir unha sede en Santiago. “UCIN Compostela está para os veciños”, asegurou Mallo, quen fixo un chamamento á cidadanía a achegarse e seguir as súas propostas nas redes sociais.
