Preocupación do alcalde de Val do Dubra: «Temos 400 tractores parados por unha avaría na ITV móbil»

O alcalde de Val do Dubra, Diego Díaz, participou por primeira vez nunha entrevista en Radio Líder Santiago para abordar as preocupacións máis importantes dos seus veciños e veciñas. Ao longo da conversa, tratou temas como a vivenda, a mobilidade, o estado dos servizos públicos e o futuro de Val do Dubra como concello rural en expansión.

Un dos temas centrais foi a escaseza de vivendas dispoñibles. Con case 4.000 habitantes, Val do Dubra ten dificultades para acoller novos residentes debido á falta de vivenda en alugueiro e venda. “Se tivésemos máis vivendas, o concello medraría moito máis rápido”, asegurou Díaz, quen subliñou que esta situación tamén está a afectar aos traballadores que buscan aloxarse fóra de Santiago de Compostela.

Outro dos puntos clave foi a mobilidade e o transporte público, un servizo que non é suficiente para cubrir as necesidades dos habitantes, sobre todo para aqueles que traballan en Santiago. O alcalde recoñeceu a falta de frecuencias, algo que dificulta a vida diaria de moitos veciños. «Estamos a 20 minutos de Santiago, pero necesitamos mellorar o transporte público», dixo Díaz.

Durante a entrevista, o alcalde tamén tratou o tema da ITV móbil agrícola, que sufriu unha avaría técnica durante a inspección anual, deixando 400 vehículos sen revisión. «Temos 400 tractores parados por unha avaría na ITV móbil», explicou preocupado. Aínda que o concello non ten competencia directa sobre este servizo, Díaz afirmou estar a traballar con outras institucións para atopar unha solución rápida.

Por outra banda, mencionou a inminente rehabilitación da Fábrica da Telleira, unha das obras máis ambiciosas do mandato, que mellorará a entrada ao concello e dará unha nova imaxe ao núcleo de Benvibre.

Finalmente, o alcalde destacou a importancia de manter Val do Dubra como un paraíso natural e expresou a súa oposición á instalación dun vertedoiro nunha antiga canteira abandonada. «Val do Dubra é un paraíso natural… e non imos permitir un vertedoiro aquí», sentenciou, subliñando que tanto o concello como a plataforma veciñal están loitando para evitar este proxecto.

A entrevista completa no seguinte enlace.