Premios, descontos e concurso nos institutos: a fórmula de Santiago para revitalizar o comercio local

Premios, descontos e concurso nos institutos: a fórmula de Santiago para revitalizar o comercio local | vive.gal

«Temos que volver aos escaparates. Nas tendas hai vida, hai trato humano, e iso é insubstituíble«, reivindica Seijas. E faino coa paixón de quen leva anos loitando por manter vivo un tecido comercial que considera vital para o pulso diario da cidade.

A entrevista concedida á emisora local Radio Líder Santiago foi un repaso completo á realidade do sector. O presidente destacou que a nova aplicación, intuitiva e sinxela, ten dobre vertente: por unha banda, permite aos clientes acumular puntos que poderán canxear por descontos e agasallos; por outra, os comerciantes poden seguir as compras e premiar a fidelidade da clientela. «É un escaparate dixital, si, pero que remata no físico. Queremos que os mozos volvan entrar nas tendas e vexan que o trato é máis próximo, máis profesional, máis humano ca en calquera pantalla», explicou.

A preocupación pola perda de clientela nova foi un dos eixos da conversa. «A xente nova merca co móbil. E se non facemos algo, acabaremos sendo só para xente maior, e o comercio local esmorecerá», lamentou Seijas. Por iso, a app preséntase como un primeiro paso para atraer á mocidade, coa promesa de agasallos de benvida e descontos progresivos.

Un sector en risco

Seijas recoñeceu con franqueza que o comercio en Santiago «non pasa por boas horas». Citou diversos factores que están a impactar negativamente: o aumento da competencia en liña, a dificultade para atopar relevo nos negocios familiares, os altos prezos dos alugueiros e, sobre todo, o risco que supón para un emprendedor poñer en marcha un novo negocio. «Abrir un comercio é un acto de valentía. Ponse en xogo o patrimonio persoal. Ninguén che asegura nada. O risco é enorme e os apoios son poucos.«

Neste contexto, a asociación aposta pola unión e o traballo conxunto, tanto entre comerciantes como coas institucións. «Se non nos unimos e non traballamos xuntos, temos a batalla perdida«, afirmou.

Concienciar dende a escola: Santiago sen comercio

Un dos proxectos máis ambiciosos da asociación é o que están a desenvolver co Café Casino e os centros educativos da cidade: un concurso de redacción escolar no que os alumnos da ESO e Bacharelato reflexionarán sobre como sería Santiago sen comercio local. «Queremos introducir o comercio local no imaxinario dos máis novos. Se conseguimos que se impliquen, que pensen sobre o que pasaría se desaparece o comercio de barrio, teremos gañado moito.«

O concurso contará cun xurado formado por persoas do mundo da cultura e escritores de prestixio. Haberá premios para os mellores alumnos e tamén para os centros participantes. Unha forma de ligar o ensino co tecido comercial, e de plantar a semente dunha conciencia cívica que vaia máis alá do consumo rápido.

Campañas que funcionan

A conversa tamén permitiu repasar algunhas das campañas que a asociación leva impulsando desde a súa creación, hai xa oito anos. Entre elas destaca o “Merca e Gaña”, onde os clientes participan en sorteos tras subir as súas compras mediante un código QR. Ou os “Días Azuis”, unha campaña a nivel galego promovida pola Federación Galega de Comercio, na que este ano se sortearán premios de ata 3.000 euros para gastar en negocios locais. «Estas campañas funcionan porque devolven os cartos ao comercio. É un círculo virtuoso. E a xente responde, participa, implícase«, asegura Seijas, lembrando que o último “Merca e Gaña” tivo lugar nun día festivo e que a xente facía cola fóra porque non collía máis dentro do local.

O perigo das zonas comerciais periféricas

Outro dos puntos críticos foi a transformación dalgunhas zonas da cidade, como a Sionlla, que, segundo Seijas, está a converterse nun novo centro comercial encuberto. «A Sionlla non naceu para iso. Está expulsando á xente do centro», advertiu, sinalando que ese tipo de desenvolvementos poden debilitar o comercio do casco histórico, clave para a identidade e dinamismo da cidade. «Santiago sen comercio sería un deserto. Vivimos iso durante a pandemia, e non queremos volver aí.»

A entrevista pechouse cun chamamento á cidadanía, para que se implique, consuma localmente, e coñeza a variedade e calidade da oferta existente en Santiago. «Aquí temos de todo. Que alguén me diga algo que non se poida mercar en Santiago. Todo se pode atopar, cunha atención personalizada e profesionais de verdade.«

A Asociación Comercio Punto Compostela continúa a tecer redes, ideas e campañas para evitar que a cidade perda unha parte fundamental do seu carácter. E como lembra Seijas, «se o comercio local cae, cae moito máis que tendas: cae comunidade, cae cidade».

A entrevista completa, no seguinte enlace.

Síguenos en WhatsAppNoticias directo a tu móvil

Unirse →