• A actividade é gratuíta e está aberta a todas as persoas que queiran participar e dispoñan dunha cámara ou dun móbil
• Os participantes asistirán a un faladoiro sobre fotografía e visitarán a vila, o xardín botánico, o convento de Herbón e a Casa de Rosalía
• As inscricións están xa abertas na páxina web de Padrón Turismo
Líder Redacción
21 de mayo de 2025 a las 13:33
Padrón. 21-5-2025.- A comunidade de creadores de fotografía e vídeo Fotowalk Galicia e Padrón Turismo programan unha quedada fotográfica para o sábado 14 de xuño, na que se inclúen diversas visitas guiadas e que está aberta a todas as persoas que queiran participar, independentemente dos seus coñecementos fotográficos e do equipo que teñan.
A actividade é gratuíta e o único requisito que deben cumprir os participantes é dispoñer dunha cámara ou dun teléfono móbil para poder facer as súas propias fotos.
Iniciará a xornada un faladoiro sobre nocións fotográficas a cargo dun dos responsables de Fotowalk Galicia, para despois dedicar o resto do día a levar estes coñecementos á práctica nas visitas que os participantes realizarán a algúns dos principais atractivos turísticos de Padrón.
O programa inclúe visitas guiadas á vila medieval padronesa, ao seu xardín botánico e ao convento de Herbón e o río Ulla. Ademais, o grupo poderá percorrer por libre a Casa de Rosalía.
A organización recorda que a comida correrá por conta dos asistentes e recomenda levala da casa para poder facer un pícnic.
As persoas interesadas en participar na quedada poden xa inscribirse mandando un correo cos seus datos a fotowalkgalicia@gmail.com ou ben cubrindo o formulario dispoñible no apartado de inscricións da páxina web de Padrón Turismo (www.padronturismo.gal/inscricions).
A hora de comezo da actividade será ás once da mañá e o punto de encontro queda fixado no auditorio municipal de Padrón, localizado no Campo do Souto.
Recibe las noticias en tu correo.
