Ovidio Rodeiro: «Boqueixón avanza cara a un concello con servizos equiparables aos dunha cidade»
Líder Redacción
Líder Redacción
26 de febrero de 2025 a las 19:15
Boqueixón segue a consolidarse como un concello en crecemento, apostando pola mellora dos servizos públicos, o desenvolvemento turístico e a posta en valor das súas tradicións. Así o asegurou o alcalde, Ovidio Rodeiro, nunha entrevista recente, onde destacou os proxectos en marcha e os retos pendentes. «O noso obxectivo é que Boqueixón teña unha calidade de vida que non teña nada que envexar ás cidades», afirmou.
Entre as prioridades do goberno municipal atópanse as melloras na rede de abastecemento e saneamento. Rodeiro salientou a importancia da nova Estación Depuradora de Augas Residuais, que contou cun investimento de 1,8 millóns de euros, e a expansión da rede de saneamento para chegar ao 100% das aldeas. «Temos xa unha ampla rede de abastecemento, e agora o obxectivo é garantir que todas as parroquias teñan tamén acceso ao saneamento», explicou.
Ademais, tamén avanzou na renovación do alumeado público, cun proxecto que permitirá substituír 2.600 luminarias antes do verán. Outra mellora destacada é a expansión da fibra óptica, que xa cobre case a totalidade do concello: «Hoxe en día, a conectividade é un servizo esencial, tanto para as familias como para as empresas, e en Boqueixón queremos estar á vangarda».
O alcalde tamén puxo en valor as políticas de conciliación e servizos sociais, asegurando que ningún menor queda fóra dos programas municipais. «Temos prazas suficientes na escola infantil, nos servizos de madrugadores e nas actividades de lecer. Iso é algo do que non todos os concellos poden presumir», afirmou.
Neste sentido, destacou a posta en marcha dun novo contrato para o servizo de axuda no fogar, cun investimento de 800.000 euros anuais e unha mellora nas condicións laborais das persoas traballadoras. «Queremos garantir que os nosos maiores reciban unha atención de calidade», sinalou.
Boqueixón comeza a posicionarse como un destino turístico emerxente, grazas ao impulso de recursos naturais como o Pico Sacro e á aposta polo turismo rural. «Nos últimos anos houbo unha proliferación de vivendas turísticas que están axudando a rehabilitar espazos abandonados. Non hai risco de saturación, todo o contrario: oxalá houbera máis!», asegurou Rodeiro.
O concello tamén se está a consolidar como destino para peregrinos da Vía da Prata, con máis de 120 prazas de aloxamento dispoñibles entre albergues e vivendas de uso turístico. «Estamos creando as bases para que o turismo se converta nun sector clave na economía local», explicou o rexedor.
Boqueixón vive semanas de intensa actividade festiva co Entroido de Sergude (02 marzo) e a Festa da Filloa de Lestedo (09 marzo), dous eventos que mobilizan milleiros de persoas. «O Entroido de Sergude é unha cita histórica que nos identifica como concello, e a Festa da Filloa acadou recentemente a declaración de Interese Turístico Nacional. É un recoñecemento ben merecido para todos os veciños que levan décadas traballando por esta celebración», afirmou Rodeiro.
Este ano, a Festa da Filloa contará cunha novidade especial: un irmandamento co Cocido de Lalín, permitindo que os asistentes poidan degustar ambos pratos típicos. «Non se entende un cocido sen filloas, así que esta colaboración entre Lalín e Boqueixón é unha iniciativa lóxica e beneficiosa para os dous concellos», explicou o alcalde.
O crecemento poboacional, aínda que moderado, é outro dos sinais positivos para Boqueixón. «A diferenza doutros lugares, aquí estamos medrando, e iso demostra que somos un concello atractivo para vivir», apuntou Rodeiro. A dispoñibilidade de solo para vivenda unifamiliar e a proximidade a Santiago convérteno nun destino ideal para familias que buscan tranquilidade sen renunciar aos servizos urbanos.
Por último, o alcalde destacou o compromiso do goberno municipal con seguir mellorando infraestruturas, servizos e oportunidades. «Queremos que Boqueixón siga avanzando, pero sempre respectando a súa identidade. Somos un concello rural, pero con servizos e potencial equiparables aos dunha cidade», concluíu.
A entrevista completa, no seguinte enlace.
Recibe las noticias en tu correo.
