A proposición socialista, aprobada polo Pleno, permitiría mobilizar as máis de 6.000 vivendas baleiras de Santiago, e reclama un censo actualizado e a creación dun programa municipal que as poña en alugueiro a prezos accesibles.
Líder Redacción
26 de septiembre de 2025 a las 11:47
Santiago de Compostela, 26 de setembro de 2025. O Grupo Municipal Socialista levou onte ao Pleno municipal unha proposición, para dar resposta á grave situación da vivenda na cidade, marcada polo incremento dos prezos e as dificultades de acceso para a mocidade, estudantes, familias de ingresos medios e colectivos vulnerables. Dita proposición ficou aprobada polo Pleno.
A iniciativa socialista reclama a elaboración, no prazo máximo de seis meses, dun censo actualizado de vivenda baleira que recolla localización, tipoloxía e estado de conservación. Ademais, insta ao Goberno local a estudar a posta en marcha dun programa municipal de mobilización de vivenda baleira, inspirado no modelo Bizigune do Goberno Vasco.
Segundo explicou a concelleira socialista Marta Abal, este programa permitiría que a administración local actuase como arrendataria principal, garantindo ao propietario o cobro do alugueiro e poñendo as vivendas a disposición de persoas inscritas no rexistro municipal de demandantes, a prezos accesibles. O proxecto tamén incluiría axudas á rehabilitación e a captación de fondos doutras administracións para asegurar a súa sustentabilidade.
Na súa intervención, Abal cualificou como “alarmante” a situación do alugueiro en Santiago, recalcando a importancia de poñer en marcha políticas públicas ambiciosas que garantan o acceso digno á vivenda a curto, medio e longo prazo.
A concelleira socialista salientou que Santiago non pode permitirse ter máis de 6.000 vivendas baleiras, que representan case o 11% do parque residencial, mentres tantas persoas atopan enormes dificultades para acceder a un fogar digno.
Abal subliñou ademais que o programa proposto polos socialistas ofrece seguridade tanto ás familias que buscan unha vivenda a prezos accesibles como aos propietarios, que teñen a garantía de cobrar sempre o alugueiro e contarán con apoio municipal para rehabilitar inmobles que hoxe permanecen pechados.
Recibe las noticias en tu correo.
