O PP de Santiago reclama auga e saneamento para as vivendas das parroquias

• “Os anteproxectos, que abarcan actuacións en distintos lugares, -dixo- non contemplan a totalidade dos inmobles das parroquias afectadas e deixan se servizo a algunha a moi poucos metros das instalacións que se proxectan”.

O Partido Popular de Santiago, a través do seu concelleiro, José Ramón de la Fuente, reclámalle ao goberno nacionalista, tal e como se aprobou no pasado Pleno, que engadan, á ampliación e rehabilitación da rede municipal do ciclo integral da auga, as vivendas das parroquias de Sabugueira, A Peregrina e San Xoán de Fecha que non aparecen contempladas nos anteproxectos.

“Os anteproxectos, -explicou De la Fuente- están listos desde setembro de 2020, xa que foron elaborados polo anterior goberno pero, cando teñen pasado cinco anos, este goberno local só foi quen de licitar a redacción dos proxectos sen falar ou informar á veciñanza, máis alá do que se lles dixo, recentemente, cando a licitación xa estaba en marcha”.

Para o edil popular, “é unha mágoa, pero unha constante neste goberno nacionalista, a falta de diálogo previo cos veciños, e, neste caso, se se tivera falado antes, poderíamos ter evitado que, en poucos metros, haxa persoas que si verán dotadas as súas vivendas con estes servizos e outras terán que seguir esperando por eles, sen un horizonte temporal certo”.

“Coñecemos a distinta cualificación e características dos solos afectados, -agregou o popular-, pero compre lembrar que algúns levan desde 2007 esperando o desenvolvemento do solo, sen que haxa, a día de hoxe, trazas de que, a medio prazo, se vaia iniciar dita urbanización”.

De la Fuente subliñou que “o abastecemento e saneamento do rural de Santiago é unha débeda pendente e o goberno nacionalista debe implicarse para que a calidade de vida dos veciños que viven nestas zonas non sufra o agravio comparativo que padecen na actualidade; e esa débeda histórica precisa dunha aposta clara por parte do goberno local”.

“O Partido Popular de Santiago reclamoulle ao BNG que busque unha solución que permita satisfacer a dispoñibilidade dun servizo básico que agora mesmo non teñen, polo que, se hai vontade, -insistiu De la Fuente- seguro que hai ferramentas para artellar un arranxo, para que teñan, nun prazo razoable, uns servizos básicos”.

José Ramón de la Fuente lémbralle ao goberno nacionalista que “todos os partidos asinamos o pacto polo rural; tamén o BNG, pero agora, polo que se ve, esqueceron ese compromiso, cando tiñan unha magnífica oportunidade de visualizar que ese apoio non foi froito dunha campaña electoral”.

“Neste caso, concluíu, en lugar de incluír todas as vivendas das parroquias de Sabugueira, A Peregrina e San Xoán de Fecha, optaron polo sinxelo, desempolvar un anteproxecto de 2020 e licitalo sen revisalo, nin falar cos veciños, nin coas asociacións do rural”.