O alcalde da Estrada, Gonzalo Louzao, celebrou a adxudicación da redacción do proxecto de expropiación para a ampliación pública do polígono industrial de Toedo, o principal parque empresarial do municipio. O encargo foi realizado por Xestur á empresa Calixto Escariz S.L., dando así un novo paso nun dos proxectos estratéxicos para o desenvolvemento económico local.
Líder Redacción
9 de marzo de 2026 a las 16:17
Segundo explicou o rexedor, a redacción deste proxecto permitirá avanzar nos trámites necesarios para proceder á expropiación dos terreos incluídos na ampliación. O obxectivo é que este mesmo ano se leve a cabo o proceso expropiatorio e que, se se cumpren os prazos previstos, en 2027 poidan iniciarse as obras de urbanización.
A ampliación do polígono de Toedo suporá a creación de máis de 156.000 metros cadrados de novo solo industrial, case duplicando a superficie actual e ofrecendo novas oportunidades para a implantación de empresas e a creación de emprego no municipio.
Neste contexto, o alcalde anunciou tamén que o Concello convocará nos próximos días unha nova reunión con empresarios locais. O encontro permitirá concretar e oficializar o interese das empresas en instalarse nas novas parcelas, así como adaptar o futuro proxecto de urbanización ás súas necesidades.
O proxecto contará cun investimento superior aos 13 millóns de euros e permitirá ampliar a superficie total do polígono desde os actuais 190.554 metros cadrados ata os 347.239, o que suporá un incremento da súa capacidade nun 82%.
Recibe las noticias en tu correo.
