O concelleiro de Facenda, Manuel César Vila, presentou este luns o detalle do borrador dos orzamentos do Concello de Santiago para o exercicio 2026, unhas contas que nacen co obxectivo declarado de ser “un instrumento para implementar políticas para a xente”.
Líder Redacción
12 de enero de 2026 a las 20:00
Segundo explicou o edil, trátase duns orzamentos pensados para “mellorar a vida das persoas e construír un lugar máis diverso e igualitario, aumentando as oportunidades para todo o mundo”. Unha filosofía que se reflicte nun dato clave: case oito de cada dez euros do orzamento municipal estarán destinados á prestación de servizos públicos e ao mantemento de espazos de calidade.
Manuel César Vila subliñou que as contas poñen ás persoas e ás súas necesidades no centro da acción política, facendo especial énfase na prestación integral dos servizos públicos. “Falamos de transporte, comedores escolares, a nova depuradora, melloras na xestión administrativa e no reforzo dos bombeiros e da Policía Local”, detallou. Para o goberno municipal, liderado por Goretti Sanmartín, contar con orzamentos públicos fortes e de calidade é o eixo fundamental do benestar colectivo.
O primeiro dos eixos de actuación céntrase nunha administración máis forte e preparada. O orzamento contempla o incremento do persoal municipal: non se amortizará ningunha das 42 prazas por xubilación nin as 12 derivadas da transferencia da UMAD, e créanse novas prazas por riba da taxa de reposición. Isto permitirá reforzar, entre outros servizos, os cadros de bombeiros e policías. Ademais, prevese unha mellora das condicións salariais en cumprimento dos acordos coa representación sindical e a valorización dos postos de traballo, axustándoos á organización municipal.
O segundo eixo está orientado a manter e mellorar os servizos destinados a coidar Compostela e á súa veciñanza. Aquí inclúense o contrato do transporte urbano, os investimentos no túnel do Hórreo e na rede semafórica, as actuacións en sustentabilidade coa nova EDAR, a limpeza e recollida de residuos, así como políticas de conciliación como o SAF, os comedores escolares ou os servizos de conserxería e limpeza dos centros educativos e deportivos. Tamén se reforzan os centros socioculturais e a actividade cultural, educativa e xuvenil.
Como terceiro eixo, o Concello sitúa o coidado do espazo que se habita, con investimentos no mantemento do viario público, en obras, parques infantís e no rural, ademais do reforzo de equipamentos municipais como instalacións deportivas, a futura Casa das Persoas Maiores ou a Factoría.
O cuarto eixo aposta por tecer redes de colaboración, mediante subvencións de concorrencia competitiva para entidades asociativas veciñais, culturais, deportivas e profesionais, así como subvencións nominativas.
Por áreas, Educación, Cultura, Deportes, Centros Socioculturais, Transporte e Seguridade suman preto de 50 millóns de euros, o que representa o 30% do orzamento total. A protección social supera os 18 millóns de euros (12,2%), mentres que a transformación e mantemento de espazos de calidade concentra outros 50,1 millóns, o 33,8%.
No ámbito dos servizos públicos, destacan os 8 millóns de euros para o transporte urbano, 6,6 millóns para o servizo de axuda no fogar, 4 millóns para a nova depuradora, 2 millóns para a conserxería e limpeza dos centros escolares e 3,8 millóns para o mantemento e conservación de parques públicos.
En políticas sociais, resérvanse 1,9 millóns de euros para comedores infantís, 1,1 millón para bolsas de comedor e material escolar e 1,8 millóns para o novo contrato dos Centros Socioculturais. No capítulo de investimentos urbanos, salientan o millón de euros previsto para a Casa das Persoas Maiores, preto de 316.000 euros para a Factoría, case 900.000 euros para o colector da Avenida de Lugo, máis dun millón para investimentos en vías públicas urbanas e do rural, e 250.000 euros para o túnel do Hórreo e a rede semafórica.
O capítulo de gastos de persoal ascende a 45.819.740,98 euros. Os gastos correntes sitúanse en 139.076.033 euros, os gastos de capital en 6.076.099 euros e os gastos financeiros en 3.117.477,61 euros.
Polo lado dos ingresos, 50,8 millóns proceden de impostos directos e 8,2 millóns de indirectos. As taxas, prezos públicos e outros ingresos achegan 29,8 millóns de euros. Entre as principais previsións figuran 33,6 millóns polo IBI de natureza urbana, 3 millóns pola recarga do imposto de estadías turísticas, 2,5 millóns polo IVE e 5 millóns pola participación no IRPF.
Recibe las noticias en tu correo.
