4 de marzo de 2025.- A comparsa “Circo Xirarei” de Noia foi a gran gañadora do Concurso de Disfraces do Concello de Brión, celebrado este domingo e que reuniu a centos de participantes de toda a provincia. O tempo acompañou, polo que o desfile e o concurso puideron celebrarse sen incidencias, así como a gran festa de Entroido final coa actuación do Grupo Ritmo no parque de Lamiño.
O Concello de Brión repartiu máis de 2.500 euros en premios, elixidos por un xurado que valorou a creatividade e orixinalidade dos disfraces, a súa laboriosidade e a posta en escena durante o desfile, no que estiveron acompañados pola música da Charanga Os Celtas de Negreira.
Premiados nas cinco modalidades
Na categoría de comparsas entregáronse catro galardóns e un accésit. O primeiro premio de 300€ foi para o “Circo Xirarei” (Noia), seguido polas “Xirafas Peregrinas” (Oroso, 250€). Completaron o podio “Os Romanos de Pedrouzos” (Brión) e “Os Miudiños” (Muros), que gañaron 200 e 150€, respectivamente. Finalmente, o xurado outorgou un accésit de 100€ para “A Lobeirada” (Brión).
Na modalidade de grupos houbo catro premios e dous accésit. Así, os 200€ do primeiro premio foron para “Os Mini Picapedra” (Rois), mentres que os 175€ do segundo foron para “Las superheroínas nunca faltan” (Brión). O terceiro premio, dotado de 150€, recaeu na formación “Desayuna con alegría” (Ames) e o cuarto foi para “Os Potter” (Brión), que levaron 125€. En canto aos dous galardóns honoríficos, de 75€ cada un, foron para dous grupos locais: “Minimerry 2” e “As fadas gardiás do Monte da Rañalonga”.
Na modalidade individual, na categoría infantil (para cativada ata os 11 anos) o primeiro galardoado cun vale de 60€ en material didáctico foi a “Familia Loro” (A Estrada). O segundo premio, un vale de 50 €, recaeu no “Escorpiplasti” (Brión), mentres que o terceiro galardón, un vale de 40€, foi para o disfrace “Baila co Vento” (Noia). Por outra banda, na categoría adultos, os 100€ euros do primeiro premio foron para Negreira da man do “Furbi Remolón”, mentres o segundo premio, de 75€, foi para o “Pavo Real” (Brión).
Dentro da modalidade de parellas, repartíronse tres galardóns e un recoñecemento honorífico. Neste caso o primeiro premio, de 150€, foi para o dúo noiés “La Corona Británica”. Os 125€ do segundo premio foron para “Un amor monstruoso” (Noia), mentres que o terceiro premio, de 100€, foi para os “Minigreasse” (Brión). Finalmente, os 50€ do accésit foron para “Os Gamusinos” (Noia).
Recibe las noticias en tu correo.
