Un grupo de corenta persoas constituíu a Asociación Veciñal Pego-Sar nunha asemblea celebrada na Casa da Cultura de Brión. A nova entidade centrará as súas actividades na parroquia dos Ánxeles, concretamente en O Cabo, Cirro, Gándara, O Rial, Outeiro e Vilanova.
Líder Redacción
12 de febrero de 2025 a las 10:04
Os estatutos da asociación, aprobados por unanimidade, establecen a súa independencia e neutralidade política, incluíndo a prohibición de que os membros da directiva se presenten como candidatos en procesos electorais durante o seu mandato.
Entre os seus principais obxectivos atópanse a defensa dos intereses da veciñanza ante as administracións, o fomento do desenvolvemento social, cultural e económico da comunidade, a protección do medio natural e o patrimonio rural, así como a promoción da convivencia e participación cidadá.
Para cumprir con estes fins, a asociación organizará reunións, charlas informativas, eventos culturais e deportivos, proxectos para mellorar infraestruturas, campañas de sensibilización e actividades educativas para a infancia.
A xunta directiva foi elixida por unanimidade e estará presidida por Iván Mosquera Cid, acompañado por Marisa Vales Cerqueiro como vicepresidenta, Eliseu Mera Quintas como secretario, María del Busto Griñón como tesoureira e Laura Pazos Pintor como vogal.
A próxima fase será a inscrición no Rexistro de Asociacións da Xunta de Galicia, tras a cal se celebrará unha nova asemblea para definir as primeiras accións e trasladar as súas propostas ao Concello de Brión e aos grupos municipais.
Recibe las noticias en tu correo.
