Nace a Asociación de Turismo e Hostalería Compostela para a defensa dun turismo responsable
O pasado 13 de xaneiro creouse en Santiago de Compostela a Asociación de Turismo e Hostalería Compostela, unha entidade que ten como obxectivo a promoción e defensa do turismo na cidade. A nova asociación, rexistrada na Xunta de Galicia, busca integrar todos os sectores vinculados a este ámbito, contando con representantes de hoteis, hospedarías, vivendas de uso turístico, axencias de viaxes, locais de hostalería, guías turísticos, albergues, casas de turismo rural e outras empresas de servizos do sector.
Líder Redacción
4 de marzo de 2025 a las 12:27
A xunta directiva está encabezada por Ramón García Seara como presidente, acompañado por María Carmen Furelos Gaiteiro como tesoureira, Estrella Ferreiro Díaz como secretaria e os vogais Sara Santos Ferreiro, Juan Antonio Rivadulla Fernández e Jesús Peón Otero. Ademais, José Antonio Liñares Bar é socio fundador, aínda que non forma parte da directiva.
A Asociación aposta por un turismo responsable e conciliador, especialmente nun momento no que se percibe certa animadversión cara aos visitantes, promovida por determinados colectivos. A entidade lembra que Santiago de Compostela, cidade tradicionalmente hospitalaria, debe gran parte do seu desenvolvemento económico á afluencia turística, en particular ao Camiño de Santiago.
Neste contexto, a nova Asociación comprométese non só a defender os intereses dos seus asociados, senón tamén a deseñar e poñer en marcha iniciativas que fomenten un turismo sostible e respectuoso. Para iso, considera fundamental a colaboración entre administracións, entidades e colectivos locais, co fin de manter un equilibrio entre a convivencia cidadá e o desenvolvemento turístico.
