Minuto de silencio en Santiago e Ames polas persoas veciñas de Laraño falecidas nun accidente

 

 

05/03/2024 A praza do Obradoiro acolleu este mediodía un minuto de silencio polo pai e a súa filla, veciños de Laraño, falecidos o domingo nun accidente de tráfico.

A alcaldesa de Santiago, Goretti Sanmartín, outros/as integrantes da Corporación e membros do persoal municipal, participaron esta mañá no acto en recordo das persoas veciñas de Laraño, Aira Montero Fernández e Óscar Montero Puente, falecidas o pasado domingo nun tráxico accidente de tráfico. O minuto pechouse cun aplauso.

O Concello de Santiago pretende con este minuto de silencio trasladar o seu apoio e solidaridade ás familias das vítimas do lamentable accidente mortal que tivo lugar o pasado 3 de marzo.

Doutra banda, o alcalde de Ames, Blas García, acompañado por outros/as concelleiros/as da Corporación municipal e persoal municipal gardaron tamén un minuto de silencio diante da Casa do Concello de Ames, en Bertamiráns, como mostra de lembranza das dúas persoas que faleceron na estrada AC-543, á altura do acceso á urbanización de Aldea Nova.

Dende o Concello de Ames mostran o seu pesar polo falecemento destas dúas persoas e mostran a súa solidariedade coa súa familia e amizades. Tamén desexan unha pronta recuperación da persoa que permanece ingresada no Hospital Clínico Universitario de Santiago de Compostela, tras verse implicada en dito accidente de tráfico.