Expertos da USC destacan que a alimentación pode condicionar enfermidades como o cancro
A catedrática de Tecnoloxía dos Alimentos da Universidade de Santiago Ángeles Romero destaca a importancia da nutrición para lograr un envellecemento saudable
A catedrática de Tecnoloxía dos Alimentos da Universidade de Santiago Ángeles Romero destaca a importancia da nutrición para lograr un envellecemento saudable
Líder Redacción
19 de noviembre de 2024 a las 12:53
Sinala que a alimentación pode condicionar moitas enfermidades, fundamentalmente as cardiovasculares, o cancro ou a diabetes
Este tema abordarase mañá mércores nas xornadas Luis Asorey, promovidas pola Academia Galega de Ciencias e a Deputación de Lugo
Santiago de Compostela-Lugo, 19 de novembro de 2024.- A Real Academia Galega de Ciencias (RAGC) e a Deputación de Lugo, coa colaboración do Campus Terra da Universidade de Santiago, teñen en marcha as “XXXV Xornadas Luis Asorey”. Esta edición versa sobre a importancia da alimentación, o medio ambiente e a saúde, cunha serie de conferencias gratuítas que se están a desenvolver no salón de actos da Deputación de Lugo (rúa San Marcos, 8), en horario de 19:00 a 21:00 horas. Solicitouse a homologación deste ciclo á Consellería de Educación, Ciencia, Universidades e Formación Profesional como actividade de formación permanente do profesorado.
A conferencia de mañá mércores centrarase no envellecemento saudable a través da nutrición, da man da catedrática de Tecnoloxía dos Alimentos da Universidade de Santiago Ángeles Romero. Doutora en Farmacia, foi a primeira muller catedrática en Galicia nesta área. É directora da Cátedra do Pan e do Cereal, coordinadora do grupo de investigación “Análise Sensorial, Valoración Nutricional e Desenvolvemento de Novos Alimentos” da USC e membro da Academia Galega de Gastronomía. Asesora e colabora con diferentes entidades e administracións para desenvolver plans e guías alimentarias destinadas a promover a alimentación saudable e defender os alimentos sustentables e de proximidade. Ademais, participa en proxectos de cooperación ao desenvolvemento en Centroamérica.
Na súa intervención, a experta abordará a relación que existe entre a saúde, a alimentación e o envellecemento. Nesta liña, salienta que “para que a alimentación poida considerarse saudable debe ser completa, harmónica, suficiente, equilibrada, adaptada, segura, sustentable, alcanzable e satisfactoria”.
“A alimentación pode condicionar moitas enfermidades, fundamentalmente as non transmisibles, como poden ser as cardiovasculares, os diferentes tipos de cancro ou a diabetes, entre outras” -destaca a investigadora da USC-. Incide ademais no feito de que non só a alimentación é fundamental para ter saúde, senón que cómpre levar un estilo de vida saudable.
En relación ao proceso de envellecemento, a experta apunta que é unha consecuencia da acumulación dunha gran variedade de danos moleculares e celulares ao longo do tempo, o que leva a un descenso gradual das capacidades físicas e mentais, a un aumento do risco de enfermidade e, finalmente, á morte. Por tanto, durante este proceso o organismo vai sufrindo unha serie de cambios físicos, fisiolóxicos, psicolóxicos, sociais…, que teñen unha consecuencia directa sobre a alimentación e a nutrición das persoas.
A innovación pode ser unha grande aliada na nutrición das persoas maiores
Ángeles Romero remarca que, segundo os últimos datos publicados polo Instituto Galego de Estatística, un 26% da poboación en Galicia ten unha idade igual ou superior a 65 anos e a previsión é que esta porcentaxe siga a incrementarse progresivamente, polo que “é necesario abordar o proceso de envellecemento de forma integral para alcanzar as mellores condicións na vellez, tendo en conta así mesmo a diversidade de situacións que poden existir neste proceso”. A investigadora sinala que a innovación pode ser unha grande aliada na nutrición das persoas maiores, xa sexa para deseñar e desenvolver alimentos que sendo nutricionalmente equilibrados sexan, ademais, apetecibles e adaptados ás capacidades de manexo deste sector da poboación.
Recibe las noticias en tu correo.