Dodro reforza os servizos sociais

 

 

O concello incorpora a unha traballadora social que se suma á que substitúe á titular, que se atopa de baixa; crea unha bolsa de traballo temporal para o SAF e agarda cubrir a praza de educadora familiar.

Dodro, 10 de xaneiro do 2024 – O concello de Dodro reforza o persoal municipal de servizos sociais ao tempo que traballa na mellora do servizo de axuda no fogar e o de educadora familiar. O alcalde, Xabier Castro, explica que é unha das prioridades do seu goberno “os servizos sociais, xa sexan como axuda directa no concello ou con servizos como o de axuda a domicilio, son sempre unha prioridade e traballamos para que funcionen do mellor xeito posible”.

Hoxe mesmo a xunta de goberno local aprobou a creación dunha bolsa de traballo temporal destinada a cubrir as posibles baixas do servizo de axuda ao fogar. Por outra banda o concello agarda tamén que se acelere o proceso de consolidación laboral que se iniciou hai meses para cubrir a vacante de educadora familiar.

Nas últimas semanas os servizos sociais do concello víronse afectados pola baixa da funcionaria titular e unha segunda baixa da substituta. Esta segunda baixa foi xa cuberta e esta semana incorporouse unha traballadora máis que reforza esta área tan importante.