Dodro abre a convocatoria de axudas de emerxencia social

Dodro, 26 de marzo do 2025 . O concello de Dodro abre a convocatoria de axudas de emerxencia social conforme as bases publicadas este luns no Boletín Oficial da Provincia da Coruña. Están destinadas a situacións puntuais de necesidade tanto individual como por unidade familiar.

Tal e como indican as bases as axudas poden ser tanto monetarias como en especie. Están destinadas a resolver situacións de emerxencia, mesmo de forma complementaria a outros recursos ou prestacións que se poidan recibir. De estas axudas poden beneficiarse as persoas ou unidades familiares do concello de Dodro.

As axudas están pensadas para a adquisición de alimentos, roupa ou produtos de primeira necesidade, menciñas, alugueres e subministracións de enerxía, axudas específicas para menores ou calquera utra necesidade distinta que terá que ser valorada polos servizos sociais do concello.

Os solicitantes terán que ser maiores de idade; estar empadroados no concello e ser residentes desde, polo menos, seis meses antes da data da solicitude (salvo informes excepcionais emitidos polo departamento de asuntos sociais) e acreditar a situación de necesidade urxente.

Tamén é preciso que a axuda teña un carácter complementario dentro dunha intervención social iniciada dende o departamento de servizos sociais coa persoa solicitante e a súa unidade familiar. Trátase de que a aportación sexa un apoio para chegar aos obxectivos que se marcaron na intervención.

As axudas están pensadas para aquelas persoas ou unidades familiares que non dispoñan dos ingresos suficientes para afrontar os gastos derivados da situación emerxencia, segundo establecido nos baremos publicados. Estes baremos comezan no 75% do IPREM e van ata o 180% do IPREM dependendo dos casos.